Qaraǵandyda 9 aılyq sábı ólimine qatysty tergeý júrip jatyr

ASTANA. QazAqparat – Qaraǵandyda reanımatsııaǵa túsip, artynan shetinep ketken 9 aılyq sábıdiń ólimine qatysty tergep-tekserý júrip jatyr. Bul týraly QR Densaýlyq saqtaý vıtse-mınıstri Aıjan Esmaǵambetova málim etti, dep habarlaıdy QazAqparat tilshisi.

«Qaraǵandydaǵy jaǵdaı boıynsha aldymen, sábıdiń ata-anasyna kóńil aıtamyn. Sábı óliminiń sebebi ázirge belgisiz, tergeý amaldary júrip jatyr. Sot-medıtsınalyq saraptamanyń alǵashqy qorytyndysy boıynsha nárestede asfıktsııa bolǵan. ıAǵnı qusý massasy», - dedi Aıjan Esmaǵambetova Ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq tilshi suraq-jaýap barysynda «sábı ólimine koronavırýs sebep bolýy múmkin be?» dep naqtylady. Spıkerdiń aıtýynsha, bul oqıǵaǵa koronavırýstyń qatysy joq.

Eske sala ketsek, buǵan deıin Densaýlyq saqtaý mınıstrligi elimizde sábı óliminiń artqanyn rastaǵan edi. Bıyl 9 aıda sábılerdiń ólim-jitimi 8,18% qurady. Ótken jyldyń 9 aıynda náreste ólimi 7,92% bolǵan.

Odan bólek, vedomstvoda balalar arasynda tynys alý aǵzalarynyń aýrýlary, qan jáne qan túzý, as qorytý júıeleri, jaraqattar, ýlaný men syrtqy sebepter áseri saldarynan paıda bolatyn aýrý túrleriniń jıi kezdesetini aıtyldy.