Qaraǵandyda 8 jasar qyzdy kórshisi órtten aman alyp qaldy
QARAǴANDY. QazAqparat - Qaraǵandyda 8 jasar qyzdy kórshi turatyn azamat órtten aman alyp qaldy. Bul týraly QazAqparat Qaraǵandy oblystyq TJD baspasóz qyzmetine silteme jasap habarlaıdy.
«12 naýryz kúni saǵat 17.07 kezinde kezekshi bólimge Petrovskıı kóshesiniń boıyndaǵy úıden órt shyqqany týraly habarlama kelip tústi. Órt sóndirýshiler kelip jetkenshe kórshi azamat 2011 jyly týǵan qyz balany órtten aman alyp qalǵan», - delingen departament málimdemesinde.
Órt sóndirý bólimsheleri oqıǵa ornynan 1974 jyly týǵan er adamnyń órt shalǵan máıitin tapty. Órt 18 saǵat 01 mınýtta sóndirilip boldy. Órt aýmaǵy 70 sharshy metrdi qamtydy. Aldyn ala jasalǵan boljam boıynsha, órttiń shyǵý sebebi - qatty otyndy jaǵý kezinde qaýipsizdik erejeleriniń saqtalmaýy.
Qaraǵandy oblysynyń tótenshe jaǵdaılar departamenti balany órtten qutqaryp qalǵan kórshisi Saıran Irgıbaevty marapattaý týraly ótinish joldaýdy kózdep otyr.
