Qaraǵandyda 8 kóshe jylýsyz qaldy

QARAǴANDY. QazAqparat – Qaraǵandy qalasyndaǵy Qurmanǵazy kóshesinde KamAZ júk kóligi jylý magıstralin zaqymdady. Nátıjesinde qalanyń birneshe ortalyq kóshesi jylýsyz qaldy, dep habarlaıdy QazAqparat tilshisi.

Kólemi úlken júk tasymaldaý barysynda jylý magıstrali zaqymdanǵan. KamAz júrgizýshisi júktiń bıiktigin esepke almaı, nátıjesinde 8 kósheniń turǵyndary jylýsyz qaldy.

«9 qarashada gabarıti úlken júkti tasymaldaǵan júk kóligi Qurmanǵazy kóshesindegi M3b jylý magıstraliniń dıametri 820 mm tik P-tárizdi kompensatoryn zaqymdady. Qazirgi ýaqytta ýchaske jylýdan óshirildi. Passajırskaıa, N.Ábdirov, Ermekov, Pıchýgın, Novoselov, Reznık, Mojaıskıı, Qurmanǵazy kóshelerindegi turǵyn úıler men obektiler apatty rejım aımaǵyna aýystyryldy. Sodan keıin jumys brıgadasy qalpyna keltirý jumysyn júrgizdi», - dep habarlady «Teplotranzıt Karaganda» JShS baspasóz qyzmeti.

Sol kúni keshke úılerdiń jylý júıesin qalpyna keltirý jáne jylý berý jumystary aıaqtaldy. Tótenshe jaǵdaıǵa kináli júrgizýshige keletin bolsaq, ol ákimshilik jaýapkershilikke tartylyp, aıyppul tóleıdi.