Qaraǵandyda 7 jyl buryn qylmys jasap, qashyp júrgen kúdikti ustaldy
QARAǴANDY. QazAqparat – Qaraǵandy polıtseıleri osydan jeti jyl buryn qaraqshylyq shabýyl jasap, 6 mln tegeden astam aqsha urlaǵan kúdiktini quryqtady. Onyń eki sybaılasy qylmys jasaǵan soń birden qolǵa túsken, alaıda úshinshi kúdikti jasyrynyp úlgergen. Tártip saqshylary oǵan izdeý jarııalaǵan. Jeti jyldan keıin polıtsııa qyzmetkerleri qaraqshyny quryqtap, qamaýǵa aldy, dep habarlaıdy QazAqparat tilshisi.
2013 jyldyń jeltoqsan aıynyń sońynda saǵat 13.30-da betperde kıgen úsh belgisiz tulǵa Qaraǵandy qalasynyń JShS-niń biriniń keńsesine basyp kirgen. Qaskúnemder qarý-jaraqpen qorqytyp, zorlyq-zombylyq kórsetip, jalpy somasy 6 857 000 teńgeni quraıtyn aqshalaı qarajatty ıemdengen.
Atalǵan jaıtqa baılanysty QR QK-niń 192-baby 4-bólimi boıynsha qylmystyq is qozǵaldy.
2014 jyldyń basynda jedel-izdestirý is-sharalary barysynda polıtsııa qyzmetkerleri atalǵan qylmystqa qatysy bar degen kúdikpen Qaraǵandy qalasynyń eki turǵynyn anyqtap, ustaǵan bolatyn. Qazirgi ýaqytta olar sottalyp, qylmystyq-atqarý júıesi mekemelerinde jazasyn ótep jatyr.
«Úshinshi kúdiktige tergeý organdary izdeý jarııalady. Jeti jyldan keıin 8 maýsymda Qaraǵandy oblysy PD krımınaldyq polıtsııa basqarmasynyń qyzmetkerleri Almaty oblysy Jetisý aýdanynyń PD qyzmetkerlerimen birlese otyryp, Almaty oblysy Birlik aýylynda qaraqshylyq jasaǵan 34 jastaǵy kúdiktini anyqtap, ustady», - dep habarlady Qaraǵandy oblysy PD bastyǵy, polıtsııa polkovnıgi Erlan Faızýllın.
Qazirgi ýaqytta ustalǵan azamat ýaqytsha ustaý ızolıatoryna qamalyp, tergeý amaldary júrgizilýde.
