Qaraǵandyda 7 júk kóligi órtenip ketti
QARAǴANDY. QazAqparat – Búgin Qaraǵandydaǵy júk kólikteri turatyn boksta órt shyǵyp, saldarynan tilsiz jaý 2000 sharshy metr aýmaqty sharpydy, dep habarlaıdy QazAqparat tilshisi.
22 aqpanda saǵat 17: 04-te Qaraǵandy qalasynyń Oktıabr aýdanynda órt paıda bolǵany týraly habar kelip tústi. Baıjanov shahtasynyń mańynda júk kólikterine arnalǵan bir qabatty boks janǵan. Ǵımarattyń shatyry men ishindegi 7 júk kóligi janyp, 2000 sharshy metr aýmaqta tóbeniń qulaýy oryn aldy.
«19 saǵat 04 mınýtta órt sóndirýshiler órtti tolyqtaı joıdy. Tilsiz jaýmen kúreske Qaraǵandy oblysy TJD Órt sóndirý jáne apattyq-qutqarý jumystary qyzmetiniń jeke quramynan 65 adam men 17 tehnıka jumyldyryldy. Zardap shekkender men qurban bolǵandar joq. Órttiń aldyn ala sebebi – pesh jabdyǵynyń aqaýlyǵy», dep habarlady Qaraǵandy oblysy TJD baspasóz qyzmeti.
