Qaraǵandyda 7-15 myń dollar alyp, jumysqa «turǵyzatyn» alaıaq sottaldy
QARAǴANDY. QazAqparat - Turǵyndardy laýazymy joǵary jumysqa turǵyzyp beremin dep aqsha alyp, san soqtyryp ketken qaraǵandylyq sottaldy, dep habarlaıdy QazAqparat tilshisi.
Túrli joldarmen adamdardan qomaqty qarjy alyp kelgen alaıaqty Qaraǵandy soty 6 jylǵa bas bostandyǵynan aıyrdy.
Buryn sottalǵan er adam óziniń tanystarynyń arasynda túrli laýazymdyq qyzmetterge adamdardy ornalastyrýǵa múmkindiginiń bar ekendigin aıtyp, aqparat taratqan.
Qylmystyq is derekterine qaraǵanda, sengish qaraǵandylyq úlken ulyn jumysqa turǵyzý úshin 15 myń dollardy, al kishi ulyn jumysqa turǵyzý úshin 7 myń dollar bergen. Al basqa adam Aqtóbedegi bir kásiporynǵa qyzyn jumysqa turǵyzý úshin mıllıon teńge bergen.
Qaraǵandynyń taǵy bir turǵyny qyzynyń medıtsınalyq kolledjdegi emtıhandaryn tapsyrdy dep jaýyp berýi úshin qomaqty aqsha bergen. Alaıaq er adam oqý ornynyń dırektoryna telefon arqyly qońyraý shalyp, ózin Qaraǵandy oblysy ákiminiń orynbasary Jandos Ábishov dep tanystyryp, stýdenttiń máselesin sheship berýin aıtqan.
Sondaı-aq, ol ózin joǵary laýazymdy sheneýnikterdiń biri retinde Ońtústik Qazaqstan oblysynyń ishki ister departamentiniń kadr jumystary basqarmasynyń basshysymen telefon arqyly sóılesip, konkýrstyq irikteýden ótpegen qaraǵandylyqty ishki ister organyna jumysqa turǵyzýdy suraǵan.
Sóıtip, er adam akterlik sheberligi men adamdardy sendire alý qabiletiniń arqasynda beldi sheneýnikter men basshylarǵa telefon arqyly habarlasyp, isin tyndyryp otyrǵan.
Nátıjesinde onyń urlyǵy ashylyp, alaıaq ustaldy.
Sýdıa Gúlnar Degenova, sottalýshynyń Qylmystyq kodeksiniń birneshe baptary boıynsha kináli dep tanylyp, 6 jylǵa sottalǵandyǵyn habarlady.
