Qaraǵandyda 6 jasqa deıingi balalar robototehnıkadan jarysýda
QARAǴANDY. QazAqparat - Qaraǵandy oblysynda robototehnıka boıynsha aımaqtyq saıystar bastaldy. Jyl ótken saıyn olardyń aýqymy men deńgeıi ósip keledi. Saıysqa túsý baǵdarlamasy kúrdelenip, básekelestik artýda, dep habarlaıdy QazAqparat.
Oblys ákimdiginiń baspasóz qyzmetinen málim etkendeı, Aqtoǵaı, Nura jáne Osakarov aýdandary men Temirtaýda jas robototehnıkter saıysy ótip úlgerdi. Aqpannyń ortasyna deıin baıqaýlar oblystyń barlyq aýdandary men qalalarynda ótedi. Eń úzdik komandalar 29-30 naýryzda Qaraǵandyda uıymdastyrylatyn «ROBOLAND-2019» robototehnıka, baǵdarlamalaý jáne ınnovatsııalyq tehnologııalardyń V Halyqaralyq festıvalinde óner kórsetetin bolady.
Oblysta bilim berý robototehnıkasyn damytý balalardyń tehnıkalyq shyǵarmashylyqqa degen qyzyǵýshylyǵyn arttyrdy. Kóptegen qalalar men aýdandarda saıysqa qatysýshylar sany birneshe ese artty. 
«RoboKRG» robototehnıka boıynsha qalalyq saıysty tórtinshi ret ótkizip otyrmyz. Bıylǵy jyly 57 oqý uıymynan 178 komanda qatysyp otyr, barlyǵy 370 oqýshy. Tórt jylda qatysýshylar sany 4 ese artty. Búgingi tańda konstrýktorlyq jınaqtar qalanyń barlyq mektepterinde bar. Al 33 mektep robototehnıka zerthanalarymen jabdyqtalǵan. Robototehnıka jýyrda ǵana damı bastaǵanyna qaramastan, bizdiń balalar qazirdiń ózinde halyqaralyq baıqaýlarda sátti óner kórsetýde», - deıdi Qaraǵandy qalalyq bilim bóliminiń sektor meńgerýshisi Natalıa Golovına.
Bıylǵy jyly qala mektepterinde 13 ІT-synyp ashyldy. Balalar jáne jasóspirimder saraıynda tehnopark paıda boldy. Osynyń barlyǵy tehnıkalyq shyǵarmashylyqtyń shekarasyn keńeıtýde.
Qatysýshylar sany artqandyqtan Qaraǵandydaǵy saıys baǵdarlamasy eki kúnge bólindi. Saıystar 13 sanat boıynsha ótkiziledi. Alǵash ret konkýrsqa 6 jasqa deıingi balalar qatysady.
