Qaraǵandyda 50 mln teńge jymqyrdy dep aıyptalǵan burynǵy sheneýnikterge úkim shyqty
QARAǴANDY. QazAqparat - Qaraǵandy oblysy Saran qalasyndaǵy memlekettik ortalyq qazandyq qurylysyna bıýdjetten bólingen 50 mln teńgeni jymqyrý boıynsha aıyptalǵan Pavlodar qazandyq zaýytynyń dırektory Tımýr Danııarov aqtaldy, dep habarlaıdy «QazAqparat» HAA tilshisi.
Qaraǵandy qalasy Qazybek bı aýdandyq sotynyń sýdıasy Manat Jumaqaeva QR QK 28-176-baby - «Senip tapsyrylǵan bóten múlikti ıelenip alý nemese ysyrap etý» boıynsha qylmys quramynyń bolmaýynan merdigerdi aqtady.
Qalǵan tórt sottalýshy - Qaraǵandy oblysy qurylys basqarmasynyń burynǵy basshysy Temirǵalı Dúısenbaev, qurylys basqarmasy bóliminiń burynǵy basshysy Nurbek Nurmaǵambetov jáne Saran qalasyndaǵy memlekettik ortalyq qazandyq qurylysyn tehnıkalyq qadaǵalaýmen aınalysqan jeke kompanııa ókilderi Muratbek Ahmetov pen Vladımır Danılchenko shartty túrde eki jylǵa sottaldy.
«Sottalýshyny aıypty dep tanyp, bas bostandyǵyn shekteýden tys jaza taǵaıyndalsyn», - dep sýdıa sottalýshylardyń árbirine úkim oqydy.
Barlyq tórt aıyptyǵa túngi ýaqytta kóńil kóterý oryndaryna barýǵa jáne QAJ departamentiniń probatsııa qyzmetine habar bermesten mekenjaıyn ózgertýge tyıym salynady.
Qaraǵandy oblysy ákimdigi jazǵan 49 mıllıon 828 myń 238 teńgeni aıyptalýshy beseýden óndirip alý týraly talap aryz qanaǵattandyrylmady.
Aıta keteıik, qazandyq qurylysy óńir úshin óte mańyzdy bolatyn. Qazandyq arqyly 43 000 myń adam turatyn qalany sapaly ortalyq jylýmen jáne ystyq sýmen qamtamasyz etedi dep kútilgen. Joba merdigeri «Pavlodar qazandyq zaýyty» JShS Qaraǵandy oblysynyń qurylys basqarmasymen 2015 jyldyń jeltoqsanynda kelisimshart bekitken. Alaıda, merdiger qarjylyq qıyndyqtardy alǵa tartyp, barlyq jumysty toqtatyp qoıǵan.
Eske sala ketsek, Qaraǵandy oblysy qurylys basqarmasynyń burynǵy basshysy Temirǵalı Dúısenbaev «Pavlodar qazandyq zaýyty» JShS atqarǵan jumystar jóninde jalǵan derekter keltirdi dep aıyptalýda. Atalǵan fırma nysandy der kezinde paıdalanýǵa bermegen. Biraq, sheneýniktiń jalǵan derek kórsetýinen bıýdjettik aqshanyń aýqymdy bóligi fırmaǵa zańsyz aýdarylǵan. Qazandyq áli kúnge deıin qoldanýǵa berilmedi.
