Qaraǵandyda 50 kıikti atyp óltirgender izdestirilip jatyr
QARAǴANDY. QazAqparat - Qaraǵandy oblysynyń Nura aýdanynda múıizderi aralap alynǵan 50 kıiktiń óleksesi tabylǵan. Janýarlar Qorǵaljyn qoryǵynyń aýmaǵynda tabyldy, dep habarlaıdy QazAqparat tilshisi.
50 kıiktiń óleksesin taýyp alǵany týraly habarlamany qoryqtyń dırektory birinshi bolyp tıisti organdarǵa jetkizgen. Aıta ketý kerek, Qorǵaljyn qoryǵy Aqmola jáne Qaraǵandy oblystarynyń aýmaǵynda ornalasqan. Quqyq qorǵaý organdarynyń ókilderi qoryqty tekserý barysynda janýarlardyń óli deneleri qoryqtyń Qaraǵandy oblysy jaǵyndaǵy aýmaǵynan tabylǵanyn málimdedi. Tergeý kezinde saıǵaqtardyń barlyǵyn qarýmen atyp óltirgeni anyqtalǵan.
Nura aýdanynyń aýmaǵynda kıikterdiń óleksesin tabý deregi boıynsha Qazaqstan Respýblıkasy Qylmystyq Kodeksiniń 337-baby 4-tarmaǵyna sáıkes sotqa deıingi tergeý amaldary bastaldy.
Atalǵan qylmysty ashýǵa baılanysty oblystyq Polıtsııa departamenti basshylyǵy Aqmola oblysy Qorǵaljyn polıtsııa bólimimen birlesip kınolog, tabıǵatty qorǵaý polıtsııa bólimi, jedel ýákilder jáne ýchaskelik polıtsııa ınspektorlarynan 2 arnaıy top qurdy. Toptyń qyzmetkerleri qylmystyń aldyn alý, ashý jáne kúdiktilerdi ustaý boıynsha keshendi jumystar atqarýda.
Oblystyq Polıtsııa departamenti Qazaqstan Respýblıkasy Qylmystyq Kodeksiniń 337-baby 4-tarmaǵy boıynsha quqyq buzýshylar bes jylǵa deıin bas bostandyǵynan aıyrylatynyn eskertedi.
