Qaraǵandyda 45 saıajaı úıi janyp ketti
QARAǴANDY. QazAqparat – Qaraǵandy qalasyndaǵy saıajaı alqaptarynyń birinde órt sóndirý qyzmetiniń 50-ge jýyq mamany tilsiz jaýmen arpalysty, dep habarlaıdy QazAqparat tilshisi.
7 qazanda saǵat 12: 18-de Qaraǵandy qalasynyń «Mır» jáne «Lých» saıajaı qoǵamdarynyń aýmaǵynda sharýashylyq qoqystar, aǵash dýaldar, qurǵaq shóp jáne 45 saıajaı ýchaskesi órtendi. Jalyn tili jalpy 20 gektar aýmaqty sharpydy.
Órt saǵat 16: 29-da aýyzdyqtalyp, saǵat 17: 36-da TJD qyzmetkerleri ony tolyǵymen joıdy. Zardap shekkender men qurban bolǵandar joq.
Qaraǵandy oblystyq TJD baspasóz qyzmetiniń aldyn ala málimdeýinshe, órttiń paıda bolýyna ashyq ot sebep bolýy múmkin.
Órtti sóndirýge TJD 48 qyzmetkeri men 9 tehnıka jumyldyryldy.
