Qaraǵandyda 43 shaqyrym sýmen jabdyqtaý jelisi aýystyrylady
QARAǴANDY. QazAqparat - «Qaraǵandy Sý» kompanııasy bıyl qaladaǵy 43 shaqyrym sý qubyry jelisin jańǵyrtýdy josparlap otyr. Sonymen qatar, osy jazda Qaraǵandy aýlalarynda 100-den astam balalar men sport alańdary paıda bolady. Áleýmettik mańyzy bar nysandarda qalany aralaý kezinde oblys ákimi Jeńis Qasymbek bolyp qaıtty, dep habarlaıdy QazAqparat tilshisi.
Óńir basshysy Prıshahtınsk turǵyndaryn tirshilik nárimen qamtamasyz etetin sý qubyry jelilerin aýystyrý jumystarynyń barysymen tanysty. Olardyń jalpy uzyndyǵy shamamen 29 shaqyrym. 21-shi, 22-shi jáne 23-shi shaǵyn aýdandar, Tıhonovka jáne Jańa Tıhonovka, kólik tsehy men Fın kentiniń tutynýshylary jańartylǵan sýmen jabdyqtaýǵa qosylady.
«Qurylys ótken jyly bastalyp, «Nurly jer» jobasy aıasynda júzege asyrylýda. Jobanyń jalpy somasy 2 mlrd teńgeden asady. Qazir biz kesteden ozdyq. Jumystardy 2021 jyly aıaqtaımyz dep josparlap otyrmyz», – dep habarlady «Qaraǵandy Sý» JShS Bas dırektory Danııar Isaev.
Aıta ketý kerek, mundaǵy jeliler 100% tozǵan. Jumystar aıaqtalǵan kezde qyzmetterdiń sapasy artady, qysym jaqsarady jáne jelilerdegi sý shyǵyny azaıady. Prıshahtınskidegi sý qubyrlaryn aýystyrý jalǵasady.
Álıhanov kóshesine keletin bolsaq, munda sýmen jabdyqtaý júıeleriniń montajyn bıylǵy jyly aıaqtaý kózdelip otyr. Danııar Isaevtyń aıtýynsha, 4 shaqyrym jelini aýystyrý ǵana qaldy. Búgingi tańda Qaraǵandyda sýmen jabdyqtaý jáne káriz qubyrlarynyń 60% jóndeýdi talap etedi. Olar boıynsha ınvestıtsııalyq baǵdarlamalar bar.
Sondaı-aq, oblys ákimi Prıshahtınskidegi aýlalar men gúlzarlardy abattandyrý jumystaryn baǵalady. Metodıcheskaıa kóshesinde gúlzarlar retke keltirildi. Munda jaryqtandyrý tirekteri, oryndyqtar men qoqys jáshikteri ornatylyp, tósemder salyndy. Sondaı-aq, Metallıstov kóshesiniń aýlalarynyń biri jańartyldy. Jańa asfalt tóselip, jaryqtandyrý tirekteri, qoqys jáshikteri, oryndyqtar, balalar oıyn jáne sport alańdary ornatyldy.
2021 jyly Oktıabr aýdanynyń 55 aýlasy abattandyrylady. Sondaı-aq, 11 fýtbol alańyna da aqsha bólingen. Qazybek bı atyndaǵy aýdannyń jas turǵyndaryn 54 aýlada ornatylatyn balalar jáne sport keshenderimen qýantpaq. Sonymen qatar, jeti fýtbol alańy ornalastyrylady.
Odan ári Jeńis Qasymbek Prıshahtınskidegi Atlant jańa sport keshenin aralap kórdi. Qurylys salýshy jeke kompanııa – «Nashı KZ» JShS. Sport ǵımaratynda basseın, toptyq sabaqtarǵa arnalǵan úsh úlken zal, kúres jáne boks zaldary bar. Oǵan balalar men eresekter qatysady.
Qalany aralaý qorytyndysy boıynsha Jeńis Qasymbek oblys ortalyǵynyń sý qubyry jelilerin aýystyrý jumystaryn baqylaýda ustaýdy jáne aýlalardy abattandyrýmen aınalysatyn uıymdardy muqııat qadaǵalaýdy tapsyrdy.
