Qaraǵandyda 40-tan astam jylqy men sıyr urlaǵan qylmyskerler ustaldy
QARAǴANDY. QazAqparat - «Mal urlyǵy» is-sharasynyń alǵashqy kúnderi Qaraǵandy oblysy PD qyzmetkerleri óńirde 4 aýyr qylmys jasaǵan 3 topty ustady, dep habarlaıdy QazAqparat tilshi.
Aǵymdaǵy jyldyń 14-16 mamyr aralyǵynda oblys aýmaǵynda «Mal urlyǵy» respýblıkalyq jedel aldyn alý is-sharasy ótkizildi. Krımınaldyq polıtsııa qyzmetkerleri mal urlyǵyn ashý jáne urylardyń jolyn kesý jumystaryn kúsheıtti.
10 mamyr kúni Ulytaý aýdanynyń 45 jastaǵy turǵyny polıtsııaǵa aryzdanǵan bolatyn. Tártip saqshylary jedel-izdestirý barysynda 35 jáne 39 jastaǵy oblys turǵyndaryn anyqtady. Qylmyskerler jábirlenýshige 6 mln teńge kóleminde zalal keltirgen.
Sol kúni jedel ýákilder Jańaarqa aýdanynyń aýmaǵynda 7 bas jylqy urlady degen kúdikpen taǵy bir qylmystyq topty qolǵa túsirip, ýaqytsha ustaý abaqtysyna qamady. Ustalǵandar 2018 jyldyń jeltoqsan aıynyń sońynda 7 bas jylqyny urlap, ony Jezqazǵan qalasyndaǵy mal soıý tsehtarynyń birinde satqanyn moıyndady.
Sonymen qatar, ustalǵan adamdar aǵymdaǵy jyly taǵy bir aýyr qylmys jasaǵan. 12 sáýirde polıtsııaǵa Jańaarqa aýdany Túgisken aýylynyń turǵyny aryzdanǵan. Krımınaldyq polıtsııa qyzmetkerleri oblystyń 27 jastaǵy turǵynyn anyqtady, ol joǵaryda kórsetilgen azamattarmen jáne taǵy bir toppen birlesip 12 bas jylqy urlaǵanyn jáne olardy Jezqazǵan qalasynda satqanyn moıyndady. 
Tártip saqshylarynyń aıtýynsha, mal urlaýshylar negizinen jylqy malyn aıdap ketýmen aınalysady. Alaıda iri qara mal urylary da az emes, deıdi polıtseıler. 2 mamyr kúni Jezqazǵan qalasynyń jergilikti polıtsııa bólimine 63 jastaǵy turǵyn aryzdanǵan. Belgisiz tulǵalar onyń 5 sıyryn jaıylymnan urlap, 1 mln teńgeden astam shyǵyn keltirgen. Polıtsııa qyzmetkerleri bul qylmysty tergeı kele, Jezqazǵan qalasynyń 25 jáne 30 jastaǵy turǵyndaryn ustady. Aıǵaq retinde 5 bas iri qara mal alyndy.
Joǵaryda atalǵan barlyq faktiler boıynsha QK 188-babynyń 3-bóliginiń 4-tarmaǵy boıynsha sotqa deıingi tergeý bastaldy.
