Qaraǵandyda 40 adamnan turatyn iri qylmystyq top ustaldy
«Ótken aptada ІІM uıymdasqan qylmysqa qarsy kúres departamenti UQK-niń 5 departamentimen birlesip, uzaq ýaqyt boıy Qaraǵandy oblysyndaǵy qylmystyq toptyń jolyn kesý boıynsha arnaıy operatsııa júrgizdi. Top basshysy men músheleri arasynda árqaısysynyń rólin bóletin naqty basshylyq quramy bolǵan. Qupııa saqtyq sharalary qatań saqtalǵan», - dedi Іshki ister mınıstrliginiń ókili Shuǵyla Turlybek vedomstvonyń onlaın-brıfıngisinde.
Arnaıy jáne jedel-izdestirý sharalary arqyly óńirdiń iri ónerkásiptik obektilerinde, onyń ishinde «Arsellor Mıttal Temirtaý» AQ-da taýar men materıal urlaýdyń kópdeńgeıli júıesi ashylǵan.
«Bopsalaý, densaýlyqqa aýyr zııan keltirý, kisi óltirýge oqtalý jáne buzaqylyq sekildi top músheleriniń birqatar ashylmaǵan aýyr jáne asa aýyr qylmystarǵa qatysy bary anyqtaldy. Arnaıy operatsııa barysynda 100-den astam tintý jasaldy, 9 atys qarýy, granatomet, trotıl, granatalar, qujattama men jalǵan mórler, dinı kitaptar, iri kólemde aqsha, jyljymaly jáne jyljymaıtyn múlik, sondaı-aq tyńdaýǵa arnalǵan tehnıkalyq quraldar tárkilendi. Jedel-tergeý sharalary jalǵasyp jatyr», - dedi mınıstrlik ókili.
