Qaraǵandyda 4 jyl boıy jylqy urlyǵymen aınalysqan top ustaldy
QARAǴANDY. QazAqparat – QR Іshki ister mınıstriniń tapsyrmasy boıynsha jáne «Halyq únine qulaq asatyn memleket» tujyrymdamasyn iske asyrý maqsatynda Qaraǵandy oblysynyń PD jáne onyń bólimshelerinde azamattardy qabyldaýdyń biryńǵaı kúni ZOOM ınternet platformasy arqyly ótti. Onlaın-kezdesý barysynda polıtseıler jylqy urlyǵymen aınalysqan toptyń birqatar qylmysyn ashqany belgili boldy, dep habarlaıdy QazAqparat tilshisi.
Qaraǵandy oblysy PD bastyǵy Erlan Faızýllın óziniń orynbasarlarymen jáne aýmaqtyq polıtsııa bólimderiniń bastyqtarymen bir jumys kúni aralyǵynda azamattardy qabyldady. Adamdardy negizinen belgili bir qylmystyq ister boıynsha tergeý barysy, ákimshilik jaýapkershilikke tartý máseleleri qyzyqtyrdy.
Qaraǵandy oblysynyń turǵyny Qurmanbaı Qaldybekov Krımınaldyq polıtsııa qyzmetkerlerine jylqy urlyǵyn ashqany úshin alǵys aıtý úshin Departament bastyǵynyń qabyldaýyna jazylǵan eken. Aıta ketý kerek, Qurmanbaı Tókenuly 2019 jyldyń jeltoqsan aıynyń sońynda qabyldaýda bolǵan, sol kezde aýyl turǵyny Shet aýdanynda 22 bas jylqy urlyǵyn, múliktik qylmysty ashý úshin sharalar qabyldaýdy suraǵan. Polıtsııa polkovnıgi Erlan Faızýllın ótinish berýshige isti baqylaýǵa alýǵa, barlyq qajetti jedel is-sharalar men tergeý áreketterin júrgizýge ýáde berdi.
Máselen, 3 naýryzda muqııat ázirlengen jáne saýatty júrgizilgen operatsııa barysynda Qaraǵandy oblysynyń krımınaldyq polıtsııa qyzmetkerleri Jańaarqa jáne Shet aýdandarynda jylqy urlaýǵa mamandandyrylǵan turaqty qylmystyq topty anyqtap, ustady.
Onyń quramyna Jańaarqa aýdanynyń 30-40 jas aralyǵyndaǵy birneshe turǵyny kirdi. Qylmystyq top tórt jyl boıy zańsyz áreket etken.
«Men sizge sheksiz rızamyn. Polıtsııa qyzmetkerlerimen orasan zor jumys júrgizildi. Tártip saqshylarynyń tynymsyz barlyq dáleldeý bazasyn tynymsyz jınaǵanynyń arqasynda osyndaı nátıjege qol jetkizildi. Aýyl turǵyny úshin mal – jalǵyz tabys kózi. Endi qylmyskerlerdiń áreketine sońǵy núkte qoıyldy», - dedi Qurmanbaı Qaldybekov.
«Halyq únine qulaq asatyn memleket» tujyrymdamasyn iske asyrý, halyqpen «keri baılanys» ornatý – biz úshin mańyzdy mindetterdiń biri. Týyndaǵan máseleler men problemalar jedel sheshilýi úshin oblys turǵynynyń árbir ótinishi men shaǵymdaryna tıisti jaýap beriledi. Bul is-sharany aı saıyn ótkizemiz», - dep atap ótti Qaraǵandy oblysy PD bastyǵy Erlan Faızýllın.
