Qaraǵandyda 4 jasar qyzdyń basy balkonnyń temir toryna qystyrylyp qaldy
QARAǴANDY. QazAqparat - Qaraǵandyda 4 jasar qyz balkondaǵy temir tordyń arasyna basyn tyǵyp, shyǵara almaı qalǵan. Ol qutqarýshylar kelgenge deıin birneshe saǵat boıy basy qysylǵan kúıi turǵan, dep habarlaıdy QazAqparat tilshisi.
«Qutqarý qyzmetine jeksenbi kúni, tańǵy saǵat 9-da habar tústi. Joldan ótip bara jatqan adamdar qatty jylap jatqan qyzdy baıqaǵan. Qyz basyn balkonnyń oıyǵynan shyǵaryp, turyp qalǵan. Qutqarýshylar kelgende onyń anasy úıinde bolǵan, biraq búldirshinniń qysylyp qalǵanyn estimegen. Jetinshi, segizinshi qabattaǵy kórshiler úıde bolmaǵan. Qutqarýshylar jeti mınýttyń ishinde kórshi podezdiń balkony arqyly qyzǵa barǵan», - dedi jeke qutqarý qyzmetiniń ókili Andreı Frıdovskıı.
Qutqarýshylar qyz qysylyp qalǵan balkonnyń metall toryn domkrat arqyly buzǵan.
«Búldirshin qyz qystyrylyp qalǵan basyn ózi shyǵarmaqshy bolǵan, biraq shyǵara almaǵan. Ol qulaǵy qanaǵansha basyn tartqan», - dedi qutqarý qyzmetinen.
Belgili bolǵandaı, páterde qyz anasymen birge bolǵan. Áıel qyzynyń balkonǵa shyǵyp ketkenin baıqamaǵan. Qyzdyń anasy kilti bolmaǵandyqtan, qutqarýshylarǵa esikti asha almady. Osy ýaqytta kórshiler jeke qutqarý qyzmetine de habarlasqan.
