Qaraǵandyda 4 jasar búldirshin 9-qabattyń terezesinen aıǵaılap kómek suraǵan
QARAǴANDY. QazAqparat – Qaraǵandy qalasynyń qutqarýshylary kópqabatty úıdiń toǵyzynshy qabatyndaǵy terezeden aıqaılap, kómek suraǵan balany qutqardy. Arnaıy avto baspaldaqtyń kómegimen órt sóndirýshiler joǵary kóterilip, 4 jasar balany tereza aldyndaǵy taqtaıdan sheship aldy, dep habarlaıdy QazAqparat tilshisi.
17 aqpanda Qaraǵandy qalasyndaǵy Stalelıteınaıa kóshesindegi turǵyn úıde 9-shy qabattaǵy páterdiń ashyq terezesinen kishkentaı balanyń kómekke shaqyrǵany týraly habarlama kelip tústi.
Oqıǵa ornyna Qaraǵandy oblysy TJ departamentiniń órt sóndirý jáne avarııalyq-qutqarý jumystary qyzmetiniń №11 jáne 7 órt sóndirý bólimderiniń kúsh-quraldary jedel shyqty.
«Oqıǵa ornyna jetken qutqarýshylar terezeni ashyp-jaýyp turǵan qyzdy kóredi. Qutqarýshylar birden 9-qabattyń terezesine avtosaty ornatýǵa kirisip, páterge podezd arqyly kirýge de áreket jasaıdy. Biraq páterdiń esigi jabyq bolǵan. Keıin páterde eresekterdiń joqtyǵyn túsinedi. Avtosaty ornatyp, onymen kóterilip jatqan qutqarýshylar bala súrinip nemese qorqyp bıiktikten qulap ketýi múmkin dep alańdady. Sondyqtan tereze astynda birneshe qyzmetker turdy», - dep habarlady Qaraǵandy oblystyq TJD baspasóz qyzmeti.
Avtosatymen kóterilgen qutqarýshylardy ashyq terezeniń aldynda «Meni qutqarýdyń qajeti joq, bári jaqsy» degen sózben 4 jasar qyz qarsy alady.
Jaýyngerler balamen aqyryn sóılese otyryp, páterge kirip, qyzdy tereze aldynan túsirgen.
Kóp uzamaı balanyń anasy da keledi. Anyqtalǵandaı, anasy kishi balasymen birge qyzdy jalǵyz qaldyryp, az ýaqytqa ketip qalǵan kórinedi.
«Men ol terezeni asha alady dep oılamappyn. Biz buǵan deıin de ony jalǵyz qaldyryp júrgenbiz. Biraq bul joly ol birdeńeden qorqyp, ashyq terezeden aıqaılaı bastady» dedi.
Qyzdyń ata-anasy qutqarýshylardy shaqyrǵan kórshilerine shyn júrekten alǵysyn aıtty.
Qaraǵandy oblysynyń TJD kishkentaı balalardy qaraýsyz qaldyrýdyń qaýipti ekenin eske salady.
Balaǵa terezeni birneshe santımetrden artyq ashýǵa múmkindik bermeıtin arnaıy bekitkishterdi ornatýdy usynamyz.
Eger bekitkish qurylǵy ornatý múmkindigi bolmasa, terezeniń tutqasyn alyp tastap, ony tek qajet bolǵan jaǵdaıda paıdalanyńyz.
Ashyq terezeniń janynda bolý qaýpi týraly balalarǵa únemi túsindirińizder.
