Qaraǵandyda 30 ánshi Roza Baǵlanovanyń ánderin shyrqady

QARAǴANDY. QazAqparat – Qaraǵandylyq ánshi Erbota Uzaqbaev oblystyq «Aqmańdaılym» vokaldyq baıqaýynyń Gran-prı ıegeri atandy. Іs-shara Qazaqstan jáne KSRO Halyq ártisi, Halyq qaharmany, Qazaq opera jáne estrada ánshisi Roza Baǵlanovanyń 100 jyldyǵyna arnaldy, dep habarlaıdy QazAqparat tilshisi.

Vokalshylarǵa arnalǵan konkýrsty Mádenıet, arhıvter jáne qujattama basqarmasy jáne Mádenı-saýyq jáne halyq shyǵarmashylyǵynyń ǵylymı-ádistemelik ortalyǵy uıymdastyrdy. Qaraǵandyǵa túrli qalalar men aýdandardan 30 qatysýshy jınaldy.

Qatysýshylar eki kún boıy baq talastyrdy. Birinshi týrda olar Roza Baǵlanovanyń repertýarynan án oryndaýy kerek boldy. Ekinshi kúni vokalshylar erkin taqyryptaǵy kompozıtsııany tańdap, óz sheberlikterin kórsetti.

«Baıqaý eki jas sanaty boıynsha ótkizildi – 18–35 jáne 36-50 jas. Roza Baǵlanovanyń repertýarynan «Asyl arman», «Aqmańdaılym», «Ádemi-aý» jáne «Іńkárim-aı» ánderi jıi shyrqaldy. Ekinshi týrda biz halyqtyq jáne zamanaýı kompozıtsııalardy tyńdadyq. Meniń oıymsha, Sátbaev pen Qaraǵandy vokalshylary bárinen de jaqsy óner kórsetti», – dep óz oıymen bólisti Qalı Baıjanov atyndaǵy kontserttik birlestiktiń solısi Gúlmıra Tapaı.

Uzaq talqylaýdan keıin qazylar alqasy bas júldeni qaraǵandylyq Erbota Uzaqbaevqa berdi. Birinshi oryndy Nura qalasynan Jazıra Kazımova men Qaraǵandydan Erbolat Mahanbet bólisti.

«Án aıtýmen 2006 jyldan beri aınalysamyn. Keńes Dúısekeev, Eskendir Hasanǵalıev, «Juldyz», «Atameken» syndy túrli án baıqaýlaryna birneshe ret qatysqanmyn. Bul baıqaýǵa tyńǵylyqty daıyndaldym. Birinshi týrda «Asyl arman» ánin oryndadym. Ol maǵan óte jaqyn. Ekinshi kezeńge «Ańyz arýdy» tańdadym. Bul joly qarsylastar myqty boldy, jeńis úshin kúresýge týra keldi», – deıdi Erbota Uzaqbaev.

Baıqaý jeńimpazdardyń qatysýymen ótken gala-kontsertpen aıaqtaldy.