Qaraǵandyda 24 jastaǵy kúzetshi jigit asylyp qaldy

QARAǴANDY. QazAqparat - Qaraǵandyda 24 jastaǵy jigit ózine qol jumsady. Oqıǵa ornyna kelgen dárigerler er adam asfıksııadan qaıtys bolǵan degen qorytyndy jasady, dep habarlaıdy QazAqparat tilshisi.

Qaıǵyly oqıǵa Qaraǵandy qalasynyń Prıshahtınsk shaǵynaýdanynda bolǵan.

Jigit qaladaǵy kásiporyndardyń birinde kúzetshi bolyp jumys istegen.

Tanystarynyń aıtýynsha, ol jalaqysy az bolǵandyqtan nesıesin jaba almaı júrgenin aıtyp shaǵymdanǵan.

Jigitti týystary esik tutqasyna baılanǵan jipke asylyp turǵan jerinen taýyp, jedel járdem shaqyrǵan.

Alaıda, oqıǵa ornyna kelgen dárigerler jigit qaıtys boldy dep málimdedi.

«Brıgada qońyraý túskennen keıin 5 mınýttan keıin keldi. Ólimniń sebebi - sýıtsıd», - dep habarlady Qaraǵandy oblysy densaýlyq saqtaý basqarmasynyń baspasóz qyzmeti.

Atalmysh derek boıynsha polıtsııa tergeý júrgizip jatyr.

«Bul fakt polıtsııada tirkelgen. Qajetti saraptamalar taǵaıyndaldy. Qazirgi ýaqytta bolǵan oqıǵanyń mán-jaıy anyqtalyp jatyr», - dep habarlady Qaraǵandy oblysy PD baspasóz qyzmeti.