Qaraǵandyda 23 mektep oqý jylyna áli daıyn emes

QARAǴANDY. QazAqparat – Qaraǵandyda 20-dan astam bilim nysany jańa oqý jylyna daıyn emes. Onyń keıbirinde áli jóndeý jumystary júrip jatyr, dep habarlaıdy QazAqparat tilshisi.

Belgili bolǵandaı, Qaraǵandynyń 23 bilim ordasy oqý jylynyń bastalýyna 100 paıyz daıyn ekeni týraly akti almaǵan.

9 mektepte áli de jóndeý jumystary jalǵasyp jatyr.

Qalalyq bilim bóliminiń basshysy merdiger uıym oryndalmaǵan jumys úshin bıýdjetten bir tıyn da almaǵanyn atap ótti.

«Bizde toǵyz mektepte jóndeý júrgizetin Almatydan kelgen bir merdiger bar. Ol kompanııa jumysshylardy jaldaýda úlken qıyndyqtarǵa tap bolǵan. Bul máseleni biz baqylaýda ustap otyrmyz», - dep sendirdi Qaraǵandy qalasy bilim bóliminiń basshysy Esentaı Áshimov.

Mektepterdiń jańa oqý jylyna daıyndyq barysyn oblystyq máslıhat depýtattary tekserdi.

Olar kúrdeli jáne aǵymdaǵy jóndeý júrgizilgen 12 oqý ornynda boldy.

Monıtorıng barysynda halyq qalaýlylary bilim bólimine, mektep dırektorlaryna jáne merdigerlerge jumysty sapaly ári merziminde aıaqtaý kerektigin eske saldy.

«Atap aıtqanda, depýtattar №30, 50, 65, 85, 74, 35, 82, 21, 23, 59 mektepterge jáne №97, 38 gımnazııalarǵa bardy. Qalalyq máslıhat depýtattary jóndeý jumysyn aıaqtaý úshin berilgen usynystardyń oryndalýyn baqylady. Jyl saıyn qala bıýdjetinen bilim salasyn qarjylandyrýǵa aıtarlyqtaı soma bólinedi, shamamen 40 paıyzy», - dep habarlady Qaraǵandy qalalyq máslıhatynyń depýtaty Altyntóre Bókenov.

Sondaı-aq, depýtattar Qaraǵandynyń bilim nysandaryn jóndeıtin josyqsyz merdigerlerge alańdaýly.

Keıbir qurylys uıymdarynda arnaıy tehnıka men jumysshylar jetispeıdi. Bul óz kezeginde oryndalatyn jumystyń sapasy men merzimine áser etedi.

Sondyqtan qala bıligi Qaraǵandynyń bilim nysandaryn jóndeýmen aınalysatyn merdigerlerge baılanysty búkil problemalardy el Úkimetine jibermekshi.

Bul memlekettik satyp alý júıesin jetildirý boıynsha shara qabyldaý úshin jasalatyn qadam bolmaq.