Qaraǵandyda «220 Pýshkın serýendeıdi»
QARAǴANDY. QazAqparat - Qazaqstannyń birneshe qalalarynda 6 maýsymda orys aqyny Aleksandr Pýshkınniń 220 jyldyǵyna arnalǵan aktsııa ótedi, dep habarlaıdy QazAqparat tilshisi.
«220 Pýshkın Qazaqstanda serýendeıdi» fleshmobynyń bastamashysy Nur- Sultan qalasyndaǵy Reseılik ǵylym jáne mádenıet ortalyǵy boldy. Aktsııany basqa óńirler de qoldady, onyń ishinde Qaraǵandy oblysy da bar.
«Pýshkınniń rólin stýdentter men oqýshylar somdaıdy. Eriktiler arnaıy betperde kıetin bolady. Olar kóshedegi ótip bara jatqan adamdarǵa aqynnyń shyǵarmalary men ómirbaıany týraly suraqtar qoıady. Ol saýaldarǵa durys jaýap bergenderge uıymdastyrýshylar Aleksandr Pýshkınniń sýreti beınelengen tós belgisin syılaıdy», - dedi akıtsııanyń Qaraǵandydaǵy úılestirýshisi Stepan Vadıýnın.
Onyń aıtýynsha, fleshmob oblystyń úsh qalasynda ótedi: Qaraǵandy qalasynda Nursultan Nazarbaev dańǵylyndaǵy A. Pýshkın eskertkishiniń janynda, Ortalyq mádenıet jáne demalys saıabaǵynda, "Taır" jáne "Sıtımoll" saýda ortalyqtarynda; Temirtaýda Beıbitshilik dańǵylynda; Saran qalasynda Lenın dańǵylynda.
Barlyq jerlerde fleshmob bir ýaqytta ótedi. Bastalýy: 16.00.
Aktsııaǵa barlyq tilek bildirýshiler qatysa alady. Ol úshin Pýshkın beınesin sýretke túsirip, áleýmettik jelilerde #pushkin220kz heshtegi bar sýret salý kerek.
Uıymdastyrýshylardyń málimeti boıynsha, aktsııaǵa Almaty, Stepnogorsk jáne Kókshetaý qalalary qatysady.
A. S. Pýshkın (1979-1837) orys aqyny, dramatýrg jáne prozashy. Orys realıstik baǵytynyń negizin qalaǵan, ádebıettiń synshysy jáne teoretıgi, tarıhshy, pýblıtsıst; HІH ǵasyrdyń ortasyndaǵy eń bedeldi ádebı qaıratkerlerdiń biri.
