Qaraǵandyda 2011 jyly 140 myń sharshy metrden astam turǵyn úı paıdalanýǵa berilmek
QARAǴANDY. 23 jeltoqsan. QazAqparat /Valentına Elızarova/ - Búgin Qaraǵandy oblysynyń ákimi Serik Ahmetovtyń tóraǵalyǵymen ótken jumys keńesinde Qaraǵandy qalasynda turǵyn úı qurylysy men ınjenerlik-kommýnıkatsııalyq ınfraqurylymdy damytýdyń 2011 jylǵa arnalǵan baǵdarlamasy qaraldy.
Qaraǵandy ákimi Nurlan Áýbákirov baıan etkendeı, oblys ortalyǵynda Turǵyn úı qurylysyn damytýdyń 2011-2014 jyldarǵa arnalǵan baǵdarlamasy ázirlenip otyr. 2011 jyly túrli qarjylandyrý kózderi boıynsha oblys ortalyǵynda 140,7 myń sharshy metr baspana nemese 1758 páter paıdalanýǵa berilmek.
«2011 jylǵa sondaı-aq, Qaraǵandy yqshamdaýdandarynyń ınjenerlik-kommýnıkatsııalyq ınfraqurylymdaryn damytýǵa 1,7 mıllıard teńge qarjy qarastyrylyp otyr», dep habarlady oblys ákiminiń baspasóz qyzmetinen.
Oblys ákimi keńes qorytyndysy boıynsha Qaraǵandy basshylyǵyna birqatar tapsyrmalar, atap aıtqanda jańa baspanalardy salýda energııa únemdeýshi tehnologııalardy engizý jáne nesıelik baspanalardyń merziminde salynýyn qamtamasyz etý týraly tapsyrmalar berdi.
