Qaraǵandyda 200-ge jýyq otbasy páter kiltterin aldy
ASTANA. QazAqparat - Qaraǵandy qalasyna 192 otbasy «Nurly jer» memlekettik baǵdarlamasy boıynsha baspanaly boldy. Páterlerdiń kiltin 21 naýryzda Qaraǵandy oblysynyń ákimi Erlan Qoshanov tabystady, dep habarlaıdy QazAqparat aımaq ákimdiginiń baspasóz qyzmetine silteme jasap.
B. Momyshuly kóshesi boıyndaǵy turǵyn úı kesheninde páterlerdi alǵashqy bolyp kópbalaly, múgedek balalary bar, sondaı-aq tolyq emes otbasylar aldy. Olar «Turǵyn úı qurylys jınaq banki» AQ arqyly «Nurly jer» memlekettik baǵdarlamasyna qatysty.
«Munda jaqyn arada mektep, balabaqsha, emhana, dúkender men jaıly ómirge qajetti barlyq ınfraqurylym paıda bolady. Keleshekte bul aýdan Qaraǵandynyń ortalyǵyna aınalady. Ár otbasy úshin baspanaǵa ıe bolý - úlken arman, jáne de búgingi kúni ol armandar oryndalyp jatyr. Barlyqtaryńyzǵa Naýryz meıramy baqyt pen jaqsylyq syılasyn dep tileımin. Jańa qonys - ol tek sizderdiń ǵana qýanyshtaryńyz emes, oǵan biz de - qala, oblys basshylyǵy qatty qýanamyz.Sebebi Elbasy aldymyzǵa úlken mindet qoıdy: aımaq turǵyndarynyń áleýmettik ómir deńgeıin kóterý. Ol úshin biz jumys isteýimiz qajet. Eń basty jáne qıyn mindet - barlyq muqtaj azamattardy baspanamen qamtamasyz etý», - dedi aımaq basshysy.
Kelesi oqý jyly qarsańynda jańa yqsham aýdanda 1200 orynǵa shaqtalǵan mektep ashylady. Úılerdiń tómengi qabattarynda emhana men mektepke deıingi búldirshinderge arnalǵan shaǵyn ortalyqtarǵa oryn qaldyrylǵan.
Kún jylyna aýlalar abattandyrylatyn bolady: asfalt tóselip, jaryq shamdary ornatylady, balalar alańy qurylady.
Barlyǵy jańa turǵyn úı kesheninde 1125 páter bar. Jyl sońyna qaraı barlyq úılerdiń qurylysy aıaqtalyp, qoldanysqa berilmek. Ǵımarattardyń jalpy aýdany - 83 503 sharshy metr, onyń 59 532 - páterlerdiń aýdany.
Qazir oblys ortalyǵynda baspanaǵa kezekte 15 714 adam tur.
«Nurly jer» turǵyn úı qurylys baǵdarlamasy birneshe baǵyttardan quralady jáne qazaqstandyqtardyń turǵyn úı jaǵdaılarynyń sapasyn joǵarylatýǵa, ıpotekalyq nesıeleý sektoryn yntalandyrýǵa arnalǵan.
