Qaraǵandyda 18 jastaǵy jigit sýǵa batyp ketti
QARAǴANDY. QazAqparat - Jabdyqtalmaǵan jerde sýǵa shomylý qaıǵyly jaǵdaıǵa ákep soqty. Qaraǵandy qalasynyń Fedorov sý qoımasynda 18 jastaǵy jasóspirim úrmeli matrastan aýdarylyp túsip, sýǵa batyp ketti, dep habarlaıdy QazAqparat tilshisi.
2 shilde kúni saǵat 14:55-te Fedorov sý qoımasynda, sýǵa shomylýǵa arnalmaǵan jerde 2003 jyly týǵan jas jigittiń sýǵa batyp ketkeni týraly habarlama kelip tústi. Qazirgi ýaqytta TJD qutqarýshylary izdestirý jumystaryn júrgizýde.
Qaraǵandy oblysynyń TJD sýdaǵy qaýipsizdik erejelerin taǵy da esterińizge salady:
— arnaıy ruqsaty jáne qutqarý qyzmeti bar jabdyqtalǵan jaǵajaılarda jáne basqa da shomylýǵa arnalǵan oryndarda ǵana shomylyńyz;
— júze bilmeseńiz, belden joǵary sýǵa kirmeńiz;
— sýǵa shomylý kezinde bir-birlerińizdi kózden tasa qylmańyzdar;
— jaǵalaýdan alysqa qaltqylar men qorshaý belgilerinen ary júzbeńiz;
— júze bilmeseńiz, júzý úshin sheńberdi, úrlemeli matrastardy paıdalanbańyz;
— qaıyqtan, kópirden jáne aılaqtardan sýǵa sekirmeńiz;
— tym uzaq shomylmańyz, qatty tońyp qalýyńyz jáne sharshaýyńyz múmkin;
— túngi ýaqytta jáne mas kúıde shomylmańyz;
— balalardy bir mınýtqa da qaraýsyz qaldyrmańyz.
Osy erejelerdi saqtaý sizderge jáne balalaryńyzǵa sýdaǵy qaıǵyly jaǵdaılardan aýlaq bolýǵa kómektesedi!
Qutqarý qyzmetiniń biryńǵaı telefon nómiri – «112».
