Qaraǵandyda 17 jalǵan kompanııa arqyly, 15 mlrd teńge paıda tapqan top ustaldy
NUR-SULTAN. QazAqparat – Qaraǵandy oblysynda qylmystyq top 17 jalǵan kompanııany paıdalanyp, 15 mıllıardtan astam teńgeni qolma-qol aqshaǵa aınaldyrǵan. Bul týraly QazAqparat QR QM Qarjy monıorıngi komıtetiniń baspasóz qyzmetine silteme jasap habarlaıdy.
«Ekonomıkalyq tergeý departamentiniń qyzmetkerleri «STOP-OBNAL» jedel aldyn-alý sharasyn ótkizý nátıjesinde jumystardy naqty oryndamaı jáne taýarlardy jetkizbeı jalǵan shot-faktýralardy zańsyz rásimdeýmen aınalysqan uıymdasqan qylmystyq toptyń áreketin áshkereledi. Tergeý amaldary barysynda qylmystyq toptyń áreketine qatysty 5 tulǵa anyqtaldy. 19 mekenjaı boıynsha júrgizilgen tintý sharalary nátıjesinde júıelik bloktar jáne «1S Býhgalterııa» baǵdarlamasy bar qatqyl dıskiler, 17 zańdy tulǵanyń ETsQ-kiltteri, «kóleńkeli» býhgalterııa, 20 mór, uıaly telefondar tárkilendi», - delingen habarlamada.
Qylmystyq toptyń músheleri kedergisiz ekinshi deńgeıli bankterden 150 mln teńge jáne odan asa soma kóleminde qarajatty ózine baǵynyshty fırmalardyń esebinen alyp otyrdy.
17 jalǵan bir kúndik kompanııanyń qylmystyq áreketiniń jalpy aınalymy 15 mlrd teńgeden astam somany qurady. Nátıjesinde, memleketke salyq tólemeýden kelgen zalal 3 mlrd teńgeden astam somaǵa teń.
Aıta ketsek, qylmystyq áreketter úshin segiz jyldan on úsh jylǵa deıin bas bostandyǵynan aıyrý jazasy qarastyrylǵan.
