Qaraǵandyda 16 qabatty úıde jarylys bolyp, turǵyndar evakýatsııalanyp jatyr

QARAǴANDY. QazAqparat – Qaraǵandy qalasynda 16 qabatty turǵyn úıde jarylys boldy. Qazir adamdardy qutqarý jáne evakýatsııalaý júrip jatyr. Bul týraly Tótenshe jaǵdaılar mınıstrliginiń resmı ókili Rýslan Imanqulov málim etti, dep habarlaıdy QazAqparat tilshisi.

«Bir kireberisi bar 16 qabatty 127 páterli úıdiń boljam boıynsha 8-qabattaǵy páterinde jarylys boldy.

Oqıǵa ornyna jetken kezde anyqtalǵandaı, 8-qabattaǵy páter ashyq jalynmen janyp jatyr.

Qutqarýshylar páterlerden adamdardy qutqarý jáne evakýatsııalaý jumystaryn júrgizýde.

Úı kireberisine tútin qatty taraǵan.

Qaraǵandy oblystyq Tótenshe jaǵdaılar departamentiniń, shuǵyl-qutqarý jasaǵynyń, Apattar medıtsınasy ortalyǵynyń kúshteri men quraldary, barlyǵy jeke quramnyń 50 adamy men 12 tehnıkasy jumyldyryldy», - delingen usynylǵan habarlamada.

Qaýipsiz jerge shyǵarylǵan turǵyndardy jylytý úshin oqıǵa ornyna Qaraǵandy oblystyq Tótenshe jaǵdaılar departamentiniń 3 vahtalyq avtobýsy jóneltildi.