Qaraǵandyda 16 qabatty úıde órtten kóz jumǵan otstavkadaǵy polkovnık pen onyń otbasy bolyp shyqty

QARAǴANDY. QazAqparat - Qaraǵandydaǵy kópqabatty úıde órt shyqqan páterdiń qojaıyny zeınetke shyqqan polıtsııa polkovnıgi jáne onyń otbasy músheleri ekeni belgili boldy, dep habarlaıdy QazAqparat tilshisi.

Keshe Qaraǵandydaǵy ot sharpyǵan páterdiń ıesi - zeınettegi polıtsııa polkovnıgi. Qaza tapqan taǵy eki adam - onyń jubaıy men aǵasy bolǵan.

70 jastaǵy polkovnık Rınat Shoqaev buǵan deıin QR ІІM B. Beısenov atyndaǵy Qaraǵandy akademııasynyń saptyq bólim boıynsha bastyǵynyń orynbasary bolyp jumys istegen.

Ol akademııa kýrsynyń bastyǵy bolǵan. Marqumnyń dostary men tanystarynyń aıtýynsha, Rınat Kenjebaıuly osy ýnıversıtettiń damýyna zor úles qosqan.

Kóptegen ofıtserlerdi tárbıelegen. Ol 70 jasta edi.

Páterde sonymen qatar olardyń 43 jastaǵy uly bolǵan.

Onyń 8-shi qabattyń terezesinen qalaı qulap ketkeni áli belgisiz. Qazir ol aýrýhanada jatyr.

«Naýqastyń jaǵdaıy ortasha aýyr. Esin biledi. Jansaqtaý bóliminde. Dárigerler barlyq qajetti medıtsınalyq kómek kórsetip jatyr. Naýqas keýde qýysynan jabyq jaraqat alǵan, jilinshik súıekteri synǵan», - dep habarlady Qaraǵandy oblysy densaýlyq saqtaý basqarmasynyń baspasóz qyzmeti.

Eske sala keteıik, 10 qańtar kúni saǵat 21:29-da Qaraǵandy qalasynda Respýblıka dańǵyly, 18/2 mekenjaıynda órt shyqqany týraly habar tústi.

16 qabatty, bir kireberisti, 127 páterli turǵyn úıdiń 8-qabatyndaǵy páterde jalpy alańy 30 sharshy metr aýmaqta órt shyqqan.

1979 jyly týǵan er adam janyp jatqan páterdiń balkonynan qulap, medıtsınalyq mekemege jatqyzyldy.

Tekserý barysynda úsh adamnyń denesi tabyldy (boljam boıynsha eki er adam men áıel).

Sondaı-aq, Qaraǵandy oblysynyń TJD basshylyǵy gaz jarylysy rastalmaǵanyn habarlady. Oqıǵa ornynan gaz qurylǵylary tabylmaǵan.

Kópqabatty úıdegi órt boıynsha Qylmystyq kodekstiń 204-baby 2-tarmaǵymen qylmystyq is qozǵaldy.

Vıdeodan alynǵan kadr