Qaraǵandyda 15 000 lıtr janarmaıdy zańsyz satqan úsh stantsııa anyqtaldy
ASTANA. QazAqparat – Qaraǵandy oblysynda zańdy tirkeýsiz bıznes júrgizgen 3 janarmaı quıý stantsııasy anyqtaldy. Bul týraly QazAqparat tilshisi Qarjy mınıstrliginiń baspasóz qyzmetine silteme jasap habarlaıdy.
«Qaraǵandy oblysy boıynsha Memlekettik kirister departamenti Balqash qalasynyń aýmaǵynda jáne Qaraǵandy-Ekaterınbýrg tas jolynyń boıynda memlekettik kirister organdarynda tıisti tirkeýsiz janar-jaǵarmaı materıaldaryn ótkizý boıynsha kásipkerlik qyzmetti júzege asyrýshy 3 janar-jaǵarmaı quıý stantsııalary jelisin anyqtady. Zańsyz aınalymdaǵy óndirilgen jeri belgisiz munaı ónimderiniń jalpy kólemi 15 000 lıtrdi quraıdy. Atalǵan fakti boıynsha ákimshilik is qozǵalyp, sotta qaralatyn bolady», - dep málim etti mınıstrliktiń baspasóz qyzmetinen.
Eske salaıyq, buǵan deıin AI-95 markaly benzıni bar 3 vagon tsısternany «janarmaı qospasy» dep, elden zańsyz alyp shyqpaq bolǵandar ustalǵan edi.
