Qaraǵandyda 140 naýqas psorıazdy emdeıtin qymbat medqyzmetti tegin alyp jatyr
Qaraǵandy oblysynyń 140 turǵyny psorıazdan tegin em alady. Bul sozylmaly teri aýrýy kezinde adam denesiniń keı jerlerinde jara jáne qabyrshaqtar paıda bolady.
Aýrý býyndarǵa áser etýi múmkin, tipti múgedektikke ákelýi de ábden yqtımal.
80 qaraǵandylyqta bul aýrý aýyr túrde ótip jatyr, sondyqtan qymbat emdi qajet etedi. Patsıentter belgili bir shema boıynsha dárilik zattardan ınektsııa alady.
61 jastaǵy qaraǵandylyq Nına Pavlovaǵa (aty-jóni ózgertilgen) 2016 jyly «psorıaz» dıagnozy qoıylǵan.
Sodan beri ol únemi dári-dármek qabyldap, aýrýhanada birneshe ret emdeldi. Alaıda aýrý órship ketken. Bıyl naýqasqa ınektsııa taǵaıyndaldy.
«Men eki ampýla ınektsııasyn aldym, olardyń arasyndaǵy alshaqtyq shamamen 1 aı boldy, kelesi ınektsııa 3 aıdan keıin. Áseri bar, jaǵdaıym jeńildedi, jaralar túsin ózgertti. Bolashaqta emdeýdiń áseri kúsheıedi dep úmittenemin», - deıdi naýqas.
«Bul preparatpen emdeý deneniń kóp aımaqtary zardap shekken kezde, sondaı-aq negizgi ımmýnosýpressıvti terapııa tıimsiz bolǵan kezde aýrýdyń aýyr progressıvti túrinde taǵaıyndalady. Mundaı patsıentterge beıindi mamandardyń qatysýymen dárigerlik konsýltatsııalyq komıssııanyń sheshimi boıynsha qymbat dári-dármek taǵaıyndalady, óıtkeni preparattyń bir ampýlasynyń quny 1 mln. teńgeden asady. Bolashaqta patsıenttiń jaǵdaıy turaqty jaqsarǵanda emdeý shemasy ózgerýi múmkin. Barlyq saqtandyrylǵan patsıentter emhanada beriletin retsept boıynsha dári-dármekti tegin alady», - dep tolyqtyrdy №1 kópsalaly aýrýhananyń terapevti Nazgúl Turǵymbek.
Psorıazdy emdeý aýrýdyń aýyrlyǵyna baılanysty ambýlatorııalyq negizde, kúndizgi nemese táýlik boıǵy statsıonarda júrgiziledi.
Aýrýmen kúreste MÁMS aıasynda tegin júrgiziletin dári-dármek jáne fızıoterapııalyq em qoldanylady.
Oblysta barlyǵy 80 patsıent osy qymbat preparatpen em alady.
