Qaraǵandyda 11 áıel jórgekpulǵa qatysty alaıaqtyǵy úshin sottaldy
QARAǴANDY. QazAqparat - Júktilik járdemaqysy týraly atyshýly is boıynsha 11 áıelge shartty merzim kesildi jáne 14 áıel jazadan tolyq bosatyldy, dep habarlaıdy QazAqparat.
Taraptardyń bitimge kelýine baılanysty Qaraǵandy qalasy Qazybek bı aýdandyq sotynyń sýdıasy Manat Jumaqaeva jas bosanǵan 14 áıeldi jazadan bosatý týraly qaýly shyǵardy. Áıelder qarajatty memleketke qaıtaryp berdi jáne zardap shegýshi tarap - «Memlekettik áleýmettik saqtandyrý ortalyǵy» AQ-men bitimge keldi. Sot barlyq 14 áıelge qoldanylǵan «syrtqa shyqpaý týraly tilhat» bultartpaý sharasynyń kúshin joıdy.
Jaýapkershilikten tolyq bosatylsa da, 14 áıel qylmystyq jaýapkershilikke tartylǵan tulǵalar retinde qala beredi. Olar óz aıyptaryn moıyndaǵandyqtan, is aqtalmaıtyn negizder boıynsha toqtatylady. Qalǵan 11 áıel shartty merzimder aldy. Qylmystyq kodekstiń 190-baby - «alaıaqtyq» boıynsha olardyń árqaısysyna bir jyl jáne alty aıdan berildi. «Sot aıyptalýshylardy kináli dep tanydy jáne shartty túrde 3 jylǵa bas bostandyǵynan aıyrý túrinde jaza taǵaıyndaıdy. «QR Táýelsizdiginiń 25 jyldyǵyna baılanysty raqymshylyq jasaý týraly» Zańyna oraı, merzimniń jartysyn qysqartyp, árqaısysyna shartty túrde 1 jyl 6 aı berilsin», - dep úkim shyǵardy Manat Jumaqaeva.
Sot olarǵa járdemaqy esebinde alǵan aqshany memleketke qaıtarýdy mindettedi. Barlyq 11 áıeldiń jalpy somasy 3 mıllıon 251 myń teńgeni qurady.
Odan bólek, alaıaqtyqty uıymdastyryp, jalǵan qujattar ázirlegen almatylyq erli-zaıyptylar da shartty túrde jazalandy. Er adamǵa shartty túrde 4 jyl, onyń áıeline - shartty túrde eki jyl berildi.
Qaraǵandy oblysy járdemaqy tóleý boıynsha memlekettik ortalyq sektory meńgerýshisi shartty túrde 4 jylǵa sottaldy. Onyń sybaılasy, júkti áıelderdi alaıaqtyqqa ıtermelegen áıel shartty túrde 2 jylǵa jazalandy.
Eske sala ketsek, qylmystyq is materıaldaryna sáıkes, Almaty turǵyny jalǵan qujattarmen júktilik járdemaqysy arqyly bıýdjettik qarajatty jymqyrý úshin Qaraǵandydaǵy tanysyna júkti áıelderdi tabýdy tapsyrǵan. Qaraǵandy turǵyny sábı kútip júrgen kórshisin alaıaqtyqqa shaqyrǵan.
Almatylyq erli-zaıyptylar barlyq 25 áıeldi jalǵan qujattarmen qamtamasyz etken. Tergeýshilerdiń derekterine súıensek, Qaraǵandy oblysy Járdemaqy tóleý boıynsha memlekettik ortalyq sektory meńgerýshisi qujattardy jınaýǵa kómektesken jáne ár áıeldiń jórgekpulynan 10 paıyz alyp otyrǵan. Almatylyq erli-zaıyptylar men Qaraǵandy turǵyny da dekrettik járdemaqylardan óz paıyzdaryn alǵan. Jańa zańnamaǵa sáıkes, bosanǵan áıelderden jumys ornynan túpnusqa anyqtamalar jınaý talap etilmeıdi. Kóshirmeleri bolsa jetkilikti.
Іs boıynsha, jas bosanǵan 67 áıeldiń alaıaqtyq jolmen jórgekpul alǵany anyqtaldy. Biraq, 24 áıel «QR Táýelsizdiginiń 25 jyldyǵyna baılanysty raqymshylyq jasaý týraly» Zańy negizinde qylmystyq tergeýden bosatyldy. Taǵy 18 áıel óz aıyptaryna ókinish bildirip, tergeý organyna kómektesip, materıaldyq shyǵyndardy memleketke tolyq qaıtarǵandary úshin bosatyldy.
