Qaraǵandyda 101 jastaǵy ájeıge kúrdeli ota jasaldy
QARAǴANDY. QazAqparat - Egde jastaǵy ájege kúrdeli otany H.Maqajanov atyndaǵy Travmatologııa jáne ortopedııa oblystyq ortalyǵynyń dárigerleri jasady, dep habarlaıdy QazAqparat tilshisi.
«Biz oń jaq jambastaǵy jiliktiń býynyn endoprotezdeý jasadyq. Otanyń kúrdeliligi naýqastyń jasynyń 101-de bolýyna baılanysty edi. Negizinde, ota josparly túrde, qandaı da bir asqynýsyz sátti ótti. Qazirgi ýaqytta naýqas bastapqy ońaltý kýrsynan ótýde. Aldaǵy ýaqytta bizdiń statsıonarymyzdaǵy emdeý aıaqtalǵannan keıin naýqasty qalpyna keltirý jáne ońaltý bólimshesine aýystyrýdy josparlap otyrmyz», - dedi Shuǵyl travmatologııa bólimshesi meńgerýshisiniń m.a. Pavel Saldın.
Qazirgi ýaqytta 101 jastaǵy Nurıla Baıtasovanyń jaǵdaıy bir qalypty. Ol dárigerdiń aıtqan ortopedııalyq rejimdi saqtaıdy. Atalmysh rejimde ájeı oń jambasyna qatty salmaq túsirmeı, arnaıy qurylǵymen júredi, ortan jiliktiń urshyǵyn 90 gradýstan artyq búkpeýi tıis.
Keıýananyń nemeresiniń aıtýynsha, ájeı jambasyn syndyryp alǵanǵa deıin erkin júrip-turǵan. Ol namaz oqyp, nemereleri men shóberelerine qonaqqa bara alatyn bolǵan.
Aıta ketý kerek, Nurıla Baıtasovanyń 6 balasy, 30 nemeresi, 60 shóberesi men 6 shópshegi bar.
Dárigerlerdiń aıtýynsha, ádette mundaı jaraqattar fızıologııaǵa, anatomııaǵa jáne jasyna qaraı qarııalarǵa tán bolady. Mundaı otalar jasalatyn emdelýshilerdiń ortasha jasy 70-ten bastalady. Maqajanov atyndaǵy klınıkanyń dárigerleri ortan jiliktiń jambasqa bekıtin urshyǵyn aýystyrǵan eń qart emdelýshi 106 jasta bolǵan eken.
«Nelikten endoprotezdeýdi tańdaımyz? Sebebi 101 jastaǵy naýqastyń ortan jiliktegi urshyǵy synǵanda, onyń qaıta bitip ketý yqtımaldyǵy óte tómen, ıaǵnı 50% - dan az. Aseptıkalyq nekroz qaýpi de óte joǵary. Jáne emdelýshi tósekke tańylyp qalýy múmkin. Tipti asqynýyp ketýi yqtımad, nátıjesinde 70% jaǵdaıda ólim-jitimge ákelip soǵady. Bul operatsııa kúrdeli, alaıda ol ortan jilik urshyǵynyń synýyna qatysty barlyq táýekeldi azaıtýǵa múmkindik beredi. Otas jasalǵannan birer kúnnen soń mundaı naýqastar júrip ketedi», - dedi Pavel Saldın.
Dárigerlerdiń aıtýynsha, kelesi aptada Nurıla Baıtasova úıine shyǵarylady. Naýqastyń týystaryna saqtalýy kerek talaptar túsindirilip, qajetti konsýltatsııa berildi. Sondaı-aq dárigerler ortopedııalyq rejimdi buzbaý kerektigin eskertip otyr.
