Qaraǵandyda 100-den astam kondýktor jumyssyz qaldy

QARAǴANDY. QazAqparat – Qaraǵandy avtoparkteriniń birinde 150 qoǵamdyq kólik kondýktorymen eńbek sharty buzyldy. Buǵan elektrondy tólem júıesin engizý sebep boldy, dep habarlaıdy QazAqparat tilshisi.

Búgin tańerteń Qaraǵandynyń barlyq avtobýstary reıske kondýktorsyz shyqty. Sebebi qoǵamdyq kólikte elektrondy tólem júıesi engizildi.

Qaraǵandy avtoparkteri 150 kondýktormen eńbek shartyn buzdy. Alaıda, avtopark basshylyǵynyń aıtýynsha, olardyń bári birdeı jumyssyz qalǵan joq.

«Barlyq kondýktor jumyssyz qalǵan joq. Keıbireýleri baqylaý-tekserý qyzmetine ornalasty, bul – jolaqy tóleýdiń elektrondy júıesiniń jumysyn baqylaý úshin ashylǵan jańa qyzmet», - dep habarlady №3 avtoparkte.

Qala ákimdiginiń habarlaýynsha, saralanǵan tarıf engizilgenge deıin kondýktorlyq quramy bar №3 avtopark basshylyǵymen qalalyq jolaýshylar kóligi jumysynyń jańa shemasy týraly túsindirme júrgizilgen.

«Avtoparkte qalalyq marshrýttarda 150 kondýktor jumys istedi, onyń 50-i avtoparktiń baqylaý-tekserý quramyna qaıta daıarlandy, bir bóligi qalaaralyq marshrýttarǵa aýystyryldy. Qalǵandaryna «Ońaı» baqylaý-tekserý qyzmetine jumysqa ornalasý usynyldy, onda búgingi tańda 35-ke jýyq baqylaýshy qajet. Sondaı-aq, jumyspen qamtý ortalyǵyna habarlasýǵa bolady. Búgingi tańda ortalyqta 2000-nan astam bos jumys orny bar, sonymen qatar stıpendııa tóleı otyryp, túrli mamandyqtar boıynsha qysqa merzimdi bilim alýǵa, kásiptik daıarlaý talap etilmeıtin qoǵamdyq jumystarǵa ornalasýǵa, nemese óz isin damytýǵa memlekettik grant alýǵa múmkindik bar», - dep túsindirdi Qaraǵandy qalasynyń ákimdiginde.