Qaraǵandyda 100 avtokóliktiń qatysýymen fleshmob ótti
QARAǴANDY. QazAqparat - Qaraǵandyda qalanyń 85 jyldyq mereıtoıyna oraı 100 avtokóliktiń qatysýymen fleshmob ótti, dep habarlaıdy QazAqparat tilshisi.
Málim etilgendeı, 100 kóliktiń 12-si jol polıtsııasynyń qyzmettik mashınalary.
«Qalamyzdyń túrli alańdarynda avtokólikterdiń kómegimen «Biz seni súıemiz» degen jazýdy quryp, joǵarydan túsirip aldyq. Máselen, «súıemiz» degen sózdi ortalyq meshit aldyndaǵy alańda qurastyrdyq, «Biz» sózi «Chaıka» qonaq úıiniń mańynda jazyldy. Sebebi ol da qalamyzdyń eskertkishteriniń biri. Al «seni» sózin GGG sport kesheniniń aldynda qurastyrdyq. Biz úshin ol erekshe jer, sebebi ataqty jerlesimizdiń esimi álemge tanymal», - deıdi avtofleshmob uıymdstyrýshylarynyń biri Olga Ershova. 
Avtoklýbtardyń jetekshileri aldyn ala habarlandyrý jasap, sharaǵa kez kelgen nıet bildirýshi qatysa aldy. Daıyndyq jumystary eki aı ýaqytty qajet etti. Avtomobılder kólemi jáne tústeri boıynsha irikteldi. Júrek pishinin jasaý úshin 12 qyzyl kólik tańdaldy. Al «85» sanyn qurastyrýǵa jol polıtsııasynyń qyzmettik kólikteri qatysty.
«Osylaısha biz súıikti qalamyzdy mereıtoıymen quttyqtap, oǵan ystyq sezimimizdi bildirgimiz keldi», - deıdi Olga Ershova.
Aıazdy kúnderge qaramastan, avtokólik ıeleri birneshe saǵat boıy kompozıtsııany qurastyrýǵa qatysty. Qatysýshylarǵa fleshmob demeýshileri ystyq shaı men býterbrodtar daıyndady. Sharany uıymdastyrýǵa qala ákimdigi kómektesti.
Aıta keteıik, bul, Qaraǵandy qalasyndaǵy kólik klýbtarynyń uıymdastyryp otyrǵan úshinshi aktsııasy. Osyǵan deıin olar ardagerlerdi 9 Mamyr merekesimen, sondaı-aq qala turǵyndaryn Jańa jylmen quttyqtaǵan bolatyn.
