Qaraǵandyda 100 aýla abattandyrylady
QARAǴANDY. QazAqparat - Qaraǵandyda aýlalardy qalypqa keltirýge qatysty úsh jyldyq jospardyń iske asyrylýy týraly esep berildi, dep habarlaıdy QazAqparat tilshisi.
Qaraǵandy oblysynyń ákimi Erlan Qoshanov aýlalardy jóndeý sapasyn baqylaýdy kúsheıtýdi tapsyrdy. Sondaı-aq turǵyndardy jumys jospary týraly habardar etý kerektigin atap ótti.
«Qazir áleýmettik jelilerde aýla jaǵdaıyna shaǵymdardyń sany kóbeıgenin baıqaımyn. Sońǵy 10 kúnde bul taqyryp boıynsha 40-qa jýyq jarııalanym jazyldy. Bir aı buryn kóp shaǵymdanatyn máseleler tiziminde joldarǵa qatysty suraq kósh bastap turǵan edi. Qazir adamdar jóndeý jumystary júrip jatqanyn kórýde. Sondyqtan bolar, halyq joldar týraly az jaza bastady. Endi turǵyndar aýlalarǵa nazar aýdaryp, ondaǵy qoqystar, jaryq pen oıyn alańdarynyń joqtyǵyna shaǵymdanýda», - dedi Erlan Qoshanov apparat keńesinde.
Qaraǵandy qalasynyń ákimi Nurlan Áýbákirov aýla aýmaqtaryn abattandyrý boıynsha úsh jyldyq jospardyń iske asyrylýy týraly baıandady. Bıyl taǵy 100 aýla, 2020-shy jyly 123 aýlada jóndeý josparlanǵan, dep málim etti ol. Osylaısha, kelesi jyldyń sońyna qaraı Qaraǵandyda barlyq aýlalar retke keltirilýi tıis.
Osy jyly jumys atqaratyn merdigerler anyqtaldy. Abattandyrýdyń birinshi kezeńinde asfalttaý, jaryqtandyrý, jıek tastar, oryndyqtar, qoqys jáshikteri ornatylady, dep túsindirdi qala ákimi. Al ekinshi kezeń, Nurlan Áýbákirovtyń aıtýynsha, 2020 jyldan keıin bastalyp, ol kezde aýlalarda balalar men sport alańdaryn ornatý josparlanýda.
