Qaraǵandy jylý elektr ortalyqtarynda shyǵaryndylardy azaıtý jumysy kúsheıedi
QARAǴANDY. QazAqparat - Qaraǵandy jylý elektr ortalyqtarynda shyǵaryndylardy azaıtý jumysy kúsheıedi, dep habarlaıdy QazAqparat QR Ekologııa, geologııa jáne tabıǵı resýrstar mınıstrliginiń baspasóz qyzmetine silteme jasap.
«Karaganda Energotsentr» JShS-Qaraǵandy oblysy úshin jylý jáne elektr energııasynyń negizgi óndirýshisi sanalatyn «Karaganda Energotsentr» JShS 2020 jyly qorshaǵan ortaǵa 39 myń tonna las shyǵaryndylar shyǵarǵan. Ekologııa, geologııa jáne tabıǵı resýrstar mınıstri óńirge jumys sapary barysynda kásiporynnyń aýany lastaýdy azaıtýǵa baǵyttalǵan sharalarymen tanysty.
Atap óteıik, Qaraǵandy JEO-1 jáne JEO-3 jyl saıyn 3 mıllıon tonnadan astam kómir jaǵady. Jylý elektr ortalyqtary atmosferaǵa lastaýshy zattardyń shyǵaryndylaryn azaıtý maqsatynda 2013-2016 jyldar kezeńinde kúltutqysh qondyrǵylaryn qaıta jańartqan. Bul energııa óndirisiniń ulǵaıýymen atmosferaǵa shyǵaryndylardyń shoǵyrlanýyn 76% - ǵa azaıtýǵa múmkindik berdi. 2013-2014 jj. kezeńinde Qaraǵandy JEO-3-te atmosferaǵa lastaýshy zattar shoǵyrlanýynyń shyǵaryndylaryna monıtorıng júrgizý úshin naqty ýaqyt rejıminde baqylaýǵa bolatyn statsıonarlyq gazoanalıtıkalyq keshen ornatyldy.
Degenmen aýaǵa shyǵaryndylardy odan ári azaıta túsý úshin energoortalyq tehnıkalyq múmkindikti qarastyrýy tıis. Sonymen birge jańa kúl qazandyǵy (zolootval) salynýy kerek.
Maǵzum Myrzaǵalıev jylý elektr ortalyǵy shyǵaryndylardy azaıtý maqsatyndaǵy sharalardy úzdiksiz jalǵastyrýdy tapyrdy.
Eske sala ketsek, Ekologııa, geologııa jáne tabıǵı resýrstar mınıstri Maǵzum Myrzaǵalıev Qaraǵandy oblysyna issaparmen baryp, Ekologııalyq kodeksti túsindirý jónindegi keńes ótkizgen bolatyn.
«Kodekstiń mańyzdylyǵy onyń adam ómiri men densaýlyǵy, qolaıly ómir súrý ortasyn qamtamasyz etý, iri jáne shaǵyn bıznestiń qyzmetin, olardyń qorshaǵan ortany qorǵaý salasyndaǵy jumysyn retteý sııaqty qoǵamnyń barlyq múddelerin áser etetindiginde», - degen bolatyn Maǵzum Myrzaǵalıev jergilikti jurtshylyqpen kezdesýde.
