Qaraǵandy joldarynda «Argýs – jaıaý júrginshi» jańa kameralary synaqtan ótýde
«Argýs – jaıaý júrginshi» jol qaýipsizdik erejelerin buzýshylardy tirkeıtin kameralar ázirge qalanyń tórt qıylysynda ornatylǵan: Jaýynger-nternatsıonalıster kóshesi, 24, Erýbaev kóshesi, 41/43, Abaı men Kostenko kósheleriniń 7-shi úı qıylysynda, Saryarqa kóshesindegi «Ánet Baba» meshitiniń aýdanynda.
«Olar rettelmeıtin jaıaý júrginshiler ótkelderine baǵyttalǵan. Eki obekt, ıaǵnı kólik jáne adam paıda bolǵan kezde, kamera úsh sekýndtyq vıdeo túsirip, 2–3 fotosýret jasaıdy. Maqsat – jaıaý júrginshilerdi kólik qaǵý faktilerin boldyrmaý. Qazir bul kameralar synaq rejıminde jumys istep jatyr. Bolashaqta biz olardy resmı túrde qoldanysqa engizýdi josparlap otyrmyz», – deıdi Qaraǵandy oblysy Polıtsııa departamentiniń bastyǵy Sanjar Ádilov.
«Argýs – jaıaý júrginshi» jańa avtomattandyrylǵan baǵdarlamalyq keshenin «Perspektıva» ǵylymı-óndiristik birlestigi usynǵan.
Búgingi tańda Qaraǵandy oblysynda jol erejesin buzý faktilerin tirkeıtin 86 statsıonarlyq apparattyq-baǵdarlamalyq keshen ornatylǵan. Qaraǵandy boıynsha 60 kamera bar.
Sondaı-aq, óńirde patrýldik polıtsııa avtomobılderi «Qorǵaý – qaýipti júrgizýshi» jáne «Ekin Ratrol» zamanaýı zııatkerlik keshenderimen jabdyqtalǵan. «Qorǵaý» Qaraǵandy, Temirtaý, Saran qalalarynda engizilip, polıtseılerge tek «qaýipti» júrgizýshilermen jumys isteýge múmkindik beredi.
«Júıe jalǵan nómirleri bar, saqtandyrýsyz, izdeýde júrgen avtomobılderdi anyqtaıdy. Buǵan deıin barlyq kólikterdi toqtatyp, qujattardy tekserý qajet bolatyn. Endi júıe kóshe kameralarynyń derekterin taldaı otyryp, jaqyn mańdaǵy polıtseıdiń planshetine «qaýipti» júrgizýshi týraly habarlama jiberedi», – dep atap ótti PD bastyǵy.
Tsıfrlandyrý aıasynda oblysta Jedel basqarý ortalyǵyna jáne kezekshi bólimderge qosylǵan 9 myńnan astam beınebaqylaý kamerasy ornatyldy.
Osy jyldyń shilde aıynda vıdeokameralar men keshenderdiń sanyn ulǵaıtý josparlanǵan.
