Qaraǵandy «jasyl» oblıgatsııalar shyǵaratyn alǵashqy óńirlerdiń biri bolýy múmkin
QARAǴANDY. QazAqparat – Halyqaralyq ınvestorlar aptasy sheńberinde «Astana» halyqaralyq qarjy ortalyǵy (AHQO) ókilderi qaraǵandylyq bıznes-qaýymdastyqtarǵa «jasyl» qarjylandyrýdyń múmkindikteri jáne bolashaǵy jaıly aıtyp berdi, dep habarlaıdy QazAqparat tilshisi.
Qazgıdromettiń málimetteri boıynsha Qaraǵandy oblysy aýanyń lastaný deńgeıi boıynsha ekinshi orynda tur. Bul másele tek Qazaqstanda ǵana emes, búkil jahanda ózekti. Qazirgi tańda búkil álem jasyl ekonomıkaǵa birtindep kóshý ústinde.
Bizdiń elimizde «jasyl» qarjyny damytý baǵytynda «Astana» Halyqaralyq qarjy ortalyǵy áreke etýde. AHQO «jasyl» ekonomıkaǵa jáne ornyqty damýǵa kóshýdi yntalandyra otyryp, qajetti jaǵdaılar men ınfraqurylymdy qamtamasyz etedi.
«Jasyl» qarjylandyrý – ekologııalyq turaqty damýdyń keń aýqymyndaǵy ekologııalyq artyqshylyqtardy qamtamasyz etetin ınvestıtsııalar. Ol qorshaǵan ortany qorǵaıtyn, tabıǵı resýrstardy jınaqtaıtyn jáne klımattyń ózgerýine jol bermeýge nemese beıimdeýge kómektesetin aktsıonerlik kapıtal ınvestıtsııalarynyń barlyq nysandaryn qamtıdy. Ony energetıkalyq qaýipsizdikti arttyrýǵa kómektesetin «jasyl» ınfraqurylymdyq josparlardy jáne ónimdiligin arttyrý jónindegi, mysaly, adamdardyń densaýlyǵyn jaqsartý jónindegi jáne osıay sııaqty basqa da baǵdarlamalardy engizý úshin paıdalanady.
«Jasyl» qarjyny damytý – AHQO damýynyń negizgi baǵyttarynyń biri.
AHQO halyqaralyq ınvestorlar aptalyǵy aıasynda ortalyq mamandary osy baǵyttyń múmkindikteri men keleshegin túsindirdi.
Qazirgi ýaqytta AHQO ınvestorlarǵa qazaqstandyq naryqqa kirýge kómektesetin quraldardy ázirleýde. Olardyń biri – búkil álemde keńinen qoldanylatyn «jasyl» oblıgatsııalar. Mundaı oblıgatsııalardy satýdan túsken qarajat ekologııalyq jobalarǵa jiberiledi.
«Nelikten oblıgatsııalar qazir óte tanymal? Sebebi oblıgatsııalardyń nesıemen salystyrǵanda birqatar artyqshylyqtary bar. Bul – óteý merziminiń uzaqtyǵy, óte keń ınvestıtsııalyq baza ashylady, ıaǵnı tek bankterde ǵana emes, halyqaralyq iri qarjy ınstıtýttarynda da aqsha alýǵa bolady. Eń bastysy, nesıelerden aıyrmashylyǵy - munda kepildiń qajeti joq. Sondyqtan da bul ıkemdi qarjy quraly bolyp tabylady», - dep túsindirdi AHQO jasyl qarjy ortalyǵynyń bas menedjeri Shynar Aldajumanova.
Búgingi kúni «jasyl» oblıgatsııalardyń álemdik naryǵy jyl saıyn 40-50% ósip keledi. Qazirgi tańda atalmysh naryq shamamen 160 mıllıard dollarǵa baǵalanyp otyr, al 2020 jylǵa qaraı bul kórsetkishti 1 trıllıon dollarǵa deıin ulǵaıtý josparlanyp otyr. Klımattyq oblıgatsııalar naryǵy boıynsha kóshbasshy Qytaı jáne Qurama Shtattar bolyp tabylady.
Qazaqstanda Jasyl ekonomıka tujyrymdamasy belsendi iske asyrylýda. AHQO-nyń 2050 jylǵa qaraı balamaly jáne jańartylatyn energııany paıdalanýdyń 50% úlesine qol jetkizý maqsaty qoıyldy. «Jasyl» oblıgatsııalardy shyǵarý boıynsha keleshegi zor óńirlerdiń biri Qaraǵandy oblysy bolýy múmkin. Sebebi munda Ortalyq Azııadaǵy eń iri kún elektr stantsııalarynyń biri quryldy.
