Qaraǵandy jáne Temirtaý avtoparkteri jańa avtobýstarmen tolyǵady

Óńirde turaqty marshrýttardaǵy tozǵan avtobýstardyń úlesi 47,7%-ǵa deıin tómendedi. Buǵan ónerkásipti damytý qorynyń jeńildetilgen lızıngtik qarjylandyrý baǵdarlamasy boıynsha jańa avtobýstar satyp alý yqpal etti. Sońǵy jyldary osy baǵdarlamanyń arqasynda Qaraǵandyǵa 105 jańa avtobýs jetkizildi. Bıyl taǵy 24 avtobýs satyp alyndy, al shilde aıynyń sońyna deıin taǵy 16 jańa avtobýs jetkiziledi dep kútilýde. Temirtaýda qańtar aıynda marshrýttarǵa Dongfeng markaly 20 jańa avtobýs shyqty. Taǵy 55 birlik satyp alý josparda bar.

«Avtomobıl kóligimen jolaýshylardy tasymaldaý 210 turaqty marshrýtta júzege asyrylady, onda 1 600 birlik avtobýs parki bar 60-qa jýyq tasymaldaýshy jumys isteıdi. 338 aýyldyq eldi mekenniń 154-i turaqty avtobýs qatynasymen qamtamasyz etilgen», – dedi Saıat Shaımın.

Sonymen qatar, óńirde temirjol jáne áýe qatynasy belsendi damýda. Oblys turǵyndarynyń ótinishteri boıynsha ótken jyly Qaraǵandy – Jezqazǵan baǵytyndaǵy poıyzdyń qatynaý jıiligi artty. Oblysta barlyǵy toǵyz áleýmettik mańyzy bar temirjol qatynasy jumys isteıdi. Jyl basynan beri qyzmet kórsetý deńgeıin arttyrý úshin barlyq poıyzdarda jolaýshylarǵa arnalǵan tósek-oryn jabdyqtary jańartyldy.

«Azamattyq avıatsııa salasyn damytý da mańyzdy. Bizdiń oblys 10 avıamarshrýtqa qyzmet kórsetedi: eki halyqaralyq, jeti oblysaralyq jáne bir oblysishilik. Qyzmet kórsetý sapasy jaqsarýda. Bıyldan bastap oblysishilik Qaraǵandy-Jezqazǵan baǵytymen Qazaq Air kompanııasy aınalysady. Ushý jıiligi aptasyna tórt retke deıin ulǵaıtyldy, al bılet quny 10 myń teńgege deıin tómendedi», – dep tolyqtyrdy basqarma basshysy.

Óńirde shaǵyn avıatsııany damytý úshin eki aerodrom salý josparlanýda

– Ulytaý jáne Qarqaraly aýdandarynda. Qazirdiń ózinde tehnıkalyq-ekonomıkalyq negizdemeleri daıyn. Jaqyn arada jobalyq-smetalyq qujattama daıyndalady.

Budan basqa, jaqyn arada Balqashtyń aerovokzaly men perronyń qaıta qalypqa keltirý úshin JSQ ázirlenetin bolady.