Qaraǵandy zaýyty óz qaldyqtarynan shıkizat óndiredi
QARAǴANDY. QazAqparat - Qaraǵandydaǵy metallýrgııalyq kremnıı shyǵaratyn zaýyt óz qaldyqtarynan shıkizat óndiretin boldy, dep habarlaıdy «QazAqparat» HAA tilshisi.
Zaýyttyń basqarma tóraǵasy Murat Júkenovtiń aıtýynsha, jańa tehnologııalar órtený nátıjesinde brıkettegi monoshıhtalardy óńdeýge múmkindik beredi.
Al, monoshıhtalardan metallýrgııalyq kremnıı óndiriledi.
«Innovatsııalyq jobany júzege asyrý úshin zaýyt Qazaqstan ǵylym qorynan 300 mln teńge grant utyp alý maqsatynda konkýrsqa qatysady. Bul joba óndirisi qaldyqsyz bolǵandyqtan, qorshaǵan ortany qorǵaýǵa baǵyttalǵan. Sonymen qatar, biz óz óndirisimizdiń tehnıkalyq-ekonomıkalyq kórsetkishterin jaqsartyp, naryqtaǵy kremnııdiń básekege qabilettiligin arttyramyz», - dedi Murat Júkenov.
Ǵylym qory ár saladaǵy ınnovatsııalyq jobalardy qarjylandyrýǵa daıyn.
