Qaraǵandy volonterlerine memlekettik marapat tabys etildi

QARAǴANDY. QazAqparat – Qazaqstan Prezıdenti Qasym-Jomart Toqaevtyń tóraǵalyǵymen eriktiler jylynyń jabylý rásimi ótti. Bul jyl COVID-19 pandemııasymen sáıkes keldi. Ol bizdiń zamanymyzdyń sheshýshi jahandyq daǵdarysyna jáne eń úlken problemaǵa aınaldy. Aldyńǵy qatarǵa elimizdiń dárigerlerimen birge eriktiler de shyqty, dep habarlaıdy QazAqparat tilshisi.

Saltanatty rásimde sóılegen sózinde Prezıdent eriktilik - patrıotızmdi bildirýdiń jáne qoǵamǵa qyzmet etýdiń erekshe nysany ekenin atap ótti.

«Osy jyl ishinde eriktiler sany 100 myńnan astam adamǵa jetti. «Birgemiz» jalpyulttyq bastamasy qysqa merzim aralyǵynda kóptegen janashyr otandastardy biriktirdi. Eriktiler búginde de jumystaryn jalǵastyrýda, bir kúnge de toqtamaı qyzmet etýde. Men Sizderdi shyn júrekten maqtan tutamyn! Memleket jáne men sizderge aldaǵy ýaqytta da jan-jaqty qoldaý kórsetemiz», - dep atap ótti Memleket basshysy.

Kezdesýde Qasym-Jomart Toqaev úkimet pysyqtaýy qajet keshendi mindetterdi atap ótti. Sonymen qatar, Prezıdent júıeli negizde volonterlik qyzmetpen aınalysatyn kásiporyndardyń qyzmetkerlerin kótermeleý qajettigin atap ótti.

Qaraǵandylyq eriktiler forýmǵa onlaın qosyldy. Jergilikti eriktiler atynan Temirtaý qalasynyń turǵyny Birlikbaı Ordabaev sóz sóıledi.

«2012 jyly zeınetke shyqqannan keıin qoǵamdyq ispen aınalysýǵa bel býdym. Bul jasyma deıin «kúmis erikti» boldym. Men úshin adamdardyń shynaıy rızashylyǵynan artyq qurmet joq. Bizdiń jumysymyzdyń negizgi baǵyty - áleýmettik qoldaý. Zeınetkerlerge, soǵys ardagerlerine, tyl eńbekkerlerine jáne jalǵyzbasty qarttarǵa úlken kóńil bólemiz. Qarttardyń aıtýynsha, «Birlik bar jerde tirlik bar». Biz árqashan jastarǵa bul asyl sózderdi eske salamyz. Qýanyshta da, qıyn jaǵdaıda da jastarmen birgemiz», - deıdi Birlikbaı Ordabaev.

Іs-shara sońynda elimizdiń barlyq óńirindegi eriktiler marapattaldy. Qaraǵandy oblysynda «Jyl eriktisi» halyqaralyq syılyǵymen eriktiler qozǵalysynyń eń belsendi ókilderi marapattaldy.

«Úzdik volonterlik uıym» nomınatsııasynda Qaraǵandy qalasy Nazarbaev zııatkerlik mektebiniń «Meıirim kópiri» klýby jeńiske jetti.

«Búgingi jeńis - bizdiń oqýshylardyń, pedagogtardyń, ata-analardyń kúshimen jasaýǵa tyrysatyn úlesimizdi moıyndaý. Sonymen qatar, bul odan ári jemisti jumys jasaýǵa yntalandyrý. Memleket tarapynan berilgen osyndaı joǵary baǵa jastarymyzdyń boıynda eń jaqsy adamı qundylyqtardy odan ári belsendi tárbıeleýge mindetteıdi», - dep atap ótti «Meıirim kópiri» klýbynyń jetekshisi Gúlnar Seıitova.

«Tótenshe jaǵdaılardy joıýǵa belsendi qatysqany úshin» Qaraǵandy joǵary medıtsınalyq ınterkolledjiniń oqytýshysy Talshyn Japbasova marapattaldy.

«Men 2013 jyldan beri erikti retinde qyzmet etemin. Pandemııa kezinde oblystyq «Saryarqa jastary» shtabymen birge jumys istep, muqtaj otbasylarǵa kómektestik. Búgingi jeńistiń mańyzy zor. Bul - meni árdaıym qoldap júrgen dostarym men týystarymnyń jeńisi», - deıdi Talshyn Japbasova.

«Bilimdi nasıhattaýǵa qosqan úlesi úshin» nomınatsııasynda Balqash qalasynyń One power eriktiler klýbynyń jetekshisi Marjan Temirǵalı marapattaldy.

«Bizdiń volonterlik qyzmetimizdiń basty baǵyty – «Birgemiz: Bilim». Nomınatsııadaǵy jeńis - 100-den astam adamnan quralǵan búkil komandaǵa berilgen marapat. Sonymen qatar, bul - bilim salasyn odan ári damytý úshin úlken motıvatsııa», - deıdi Marjan Temirǵalı.

«Jyl tulǵasy» nomınatsııasy boıynsha «Jomart júrek» syılyǵy «QazTehEkspo» avtomattandyrylǵan saýda-óndiris kesheniniń bas dırektory Sáýle Sháýenovaǵa buıyrdy.