«Qaraǵandy» voleıbol klýby 2,4 mln teńgege satyldy
Oblystyq Memlekettik aktıvter men satý basqarmasynan málim etkendeı, jekeshelendirýdiń ekinshi kezeńi boıynsha satýǵa qoıylǵan «Qaraǵandy» Voleıbol klýby» JShS-niń ıesi klýbtyń qazirgi dırektory jáne komandanyń bas bapkeri Nurlan Sadyqov bolyp tanyldy. Sport klýby úshinshi satylymda 2,4 mln teńgege satyldy.
Táýelsiz baǵalaýshylar voleıbol klýbyn bastapqyda 9,6 mln tengege baǵalaǵan bolatyn. Mamyr, maýsym aılaryna belgilengen alǵashqy eki aýktsıon satyp alýshylardyń bolmaýyna baılanysty ótpeı qaldy. Osyǵan oraı, «Memlekettik múlik týraly» QR Zańyna sáıkes, kelesi saýdada nysannyń bastapqy baǵasy 50 paıyzǵa tómendetildi.
«Memlekettiń 100 paıyz úlestik qatysýy bar JShS gosreestr.kz veb-portalynda tender boıynsha ótkizilgen elektrondy saýdada 2,4 mln teńgege satyldy. Satyp alýshy - jeke tulǵa Nurlan Mıllatuly Sadyqov», -dep habarlady Memlekettik aktıvter men satyp alý basqarmasynan.
Saýdanyń sharty - qyzmet baǵytyn 10 jyl boıy saqtaý.
50 jastaǵy Nurlan Sadyqov voleıboldan KSRO jáne QR sport sheberi. Voleıboldan «I sanatty bapker» halyqaralyq sertıfıkatynyń ıegeri. «Bolat» (Temirtaý»), «Jaıyq» (Oral) voleıbol komandalarynyń quramynda oınaǵan. «Astana qanaty» (Astana), «Rabıta» (Baký) voleıbol klýbtarynda bas bapkerlik etken. 2009 jyldan búgingi kúnge deıin «Qaraǵandy» voleıbol klýbynyń dırektory jáne bas bapkeri.
«Qaraǵandy» voleıbol klýby segiz jyldan beri jumys istep keledi. 2009 jyly memlekettik kommýnaldyq mekeme bolyp qurylyp, 2010 jyly memlekettiń júz paıyzdyq úlesimen JShS-ge aınaldy. Klýbta áıelder voleıboly qanatyn keńinen jaıýda. Qazaqstannyń 12 sport sheberi daıyndaldy. Qaraǵandylyq sportshy qyzdar ulttyq quramada oınaıdy. Klýb 90% jergilikti oıynshylardan quralǵan.
«Qaraǵandy» voleıbol klýby birneshe márte Qazaqstan Qýboktarynyń jeńimpazy atandy, Ulttyq lıga komandalarynyń arasynda QR chempıonattarynyń kúmis júldegeri, joǵary lıga komandalary boıynsha QR chempıony. Klýb oıynshylarynan jasaqtalǵan Qaraǵandy oblysynyń qurama komandasy 2015 jyly bir memlekettiń aýmaǵynda ótken olımpıada oıyndaryna teń bolǵan Qazaqstan halyqtarynyń Spartakıadasynda úlken jeńiske qol jetkizdi.
Jekeshelendirýdiń 2016-2020 jyldarǵa arnalǵan keshendi jospary 2015 jyldyń jeltoqsanynda Úkimettiń Qaýlysymen bekitilgen bolatyn. Ár oblysta básekelik ortaǵa berilýge tıisti nysandar tizimi jasalyndy. Qaraǵandy oblysynda TKSh, densaýlyq saqtaý, sport j.t.b salalar boıynsha 28 nysan tizimge ilikti.
