Qaraǵandy ýnıversıtetteri Qazaqstannyń úzdik 20 JOO qataryna endi
QARAǴANDY. QazAqparat - Qaraǵandy memlekettik tehnıkalyq ýnıversıteti jáne E.Bóketov atyndaǵy Qaraǵandy memlekettik ýnıversıteti TOP-20 joǵary oqý oryndary tizimine ilikti, dep habarlaıdy QazAqparat tilshisi.
Eń úzdikterdiń tizimin Táýelsiz akkredıtteý jáne reıtıng agenttigi jasaǵan bolatyn. Bıyl agenttik reıtıngisine 87 qazaqstandyq JOO qatysty. Baǵalaýdyń negizgi ólshemsharttary retinde oqý ordasynda talantty stýdentterdiń, oqytýshylar men zertteýshilerdiń joǵary shoǵyrlanýy, akademııalyq utqyrlyq, túlekterdiń básekege qabilettiligi, oqytýshylardyń, magıstranttar men doktoranttardyń ǵylymı jarııalanymdary qarastyryldy.
E. Bóketov atyndaǵy QarMÝ osy kórsetkishter boıynsha tórtinshi oryndy ıelendi, al QarMTÝ - besinshi orynda.
Reıtıngte kósh bastap turǵan úshtik - Ál-Farabı atyndaǵy Qazaq ulttyq ýnıversıteti, Gýmılev atyndaǵy Eýrazııa ulttyq ýnıversıteti, M. Áýezov atyndaǵy Ońtústik Qazaqstan memlekettik ýnıversıteti.
Reıtıng qurastyrýshylar naqty mamandyqtar boıynsha úzdik mamandar daıyndaıtyn ýnıversıtetterdi de atap ótti. Mysaly, E. Bóketov atyndaǵy QarMÝ pedagogıkalyq jáne zańgerlik mamandyqtar, áleýmettik, ekonomıkalyq jáne jaratylystaný ǵylymdary boıynsha TOP-10 tizimine kirdi. Al tehnıkalyq mamandyqtar boıynsha úzdik ondyqqa QarMTÝ endi.
Táýelsiz akkredıtteý jáne reıtıng agenttigi úzdik oqytýshylardy da atap ótti. TOP-50 quramyna: QarMTÝ Energetıka, avtomatıka jáne telekommýnıkatsııa fakýltetiniń oqytýshysy, professor, tehnıka ǵylymdarynyń kandıdaty Alı Djavanshırovıch Mehtıev; QarMTÝ ınnovatsııa jáne oqý-ádistemelik jumys jónindegi prorektory, tehnıka ǵylymdarynyń doktory, professor Arıstotel Zeınollauly Isaǵulov; QarMTÝ mashına jasaý fakýltetiniń oqytýshysy, dotsent, Vıtalıı ıÝrevıch Kýlıkov; QarMTÝ Energetıkalyq júıeler kafedrasynyń aǵa oqytýshysy Elena Gennadevna Neshına jáne basqalar kirdi.
E.Bóketov atyndaǵy QarMÝ Fızıka-tehnıkalyq fakýltetiniń oqytýshysy, professor Qobylandy Múmárákuly Turdybekov, professor, tehnıka ǵylymdarynyń doktory Murat Ybyraıuly Ramazanov jáne tehnıka ǵylymdarynyń doktory, professor Nııazbek Hamzauly Ybraev úzdik dep tanyldy.
Sondaı - aq, reıtıngte Qaraǵandy memlekettik ındýstrııalyq ýnıversıtetiniń oqytýshylary - Vıoletta Aleksandrovna Andreıaşenko men Baqyt Ahatuly Jáýtikov ta atap ótildi.
