Qaraǵandy ýnıversıteti men jataqhanalary jylý júıesine qosylmaǵan - Ashat Aımaǵambetov

QARAǴANDY. QazAqparat - E.Bóketov atyndaǵy Qaraǵandy ýnıversıtetiniń oqý korpýstary men jataqhanalaryn ortalyqtandyrylǵan jylý júıesine qosý problemasy áli kúnge deıin sheshimin tappaı tur. Bul týraly Májilis depýtaty Ashat Aımaǵambetov aıtty, dep habarlaıdy QazAqparat.

Májilismen aımaqqa jumys sapary aıasynda osy ýnıversıtetke baryp, Qaraǵandy qalasy ákimine, «Teplotranzıt Qaraǵandy» kompanııasynyń basshysyna jáne basqa da quzyrly mekemelerge bul máseleni sheshý boıynsha talaptaryn jetkizgen.

«Dál janyndaǵy turǵyn úılerdi jylýǵa qosady da, ýnıversıtettiń jylýǵa qosylý merzimderin aýystyra beretini – stýdentter men oqytýshylardyń narazylyǵyn týǵyzýda. Bul ádiletti narazylyq dep sanaımyn.

Ýnıversıtetti qosý úshin múmkindik joq eken, al janynda salynyp jatqan jekemenshik kópqabatty úılerdi qosý múmkin eken. Paradoks qoı», - dep jazdy depýtat.

Kezdesý barysynda problemalardy joıý boıynsha birqatar sheshimder aıtyldy. Birinshi kezekte – bıyl birneshe jataqhana jylýǵa qosylsa, al kelesi jyly úshinshi jylý shyǵarǵysh bitkennen keıin qalǵandaryn qosý týraly aıtyldy.

«Bul másele bizdiń baqylaýymyzda bolady. Úshinshi jylý shyǵarǵyshty tezirek salyp bitirý úshin de biz atsalysamyz», - deıdi Ashat Aımaǵambetov.