Qaraǵandy turǵyny úsh tonna balyqpen ustaldy
TALDYQORǴAN. QazAqparat - Almaty oblysynyń tártip saqshylary Qaraǵandy oblysynyń turǵyny tizgindegen «FORD» avtokóligin tekserý barysynda iri kólemde balyq tıelgenin anyqtaǵan. 3 tonnadan astam balyqty qujatsyz tasymaldaǵan azamat memleketke 10 mıllıon teńge shyǵyn keltirgen, dep habarlaıdy QazAqparat tilshisi Almaty oblystyq Polıtsııa departamentiniń Baspasóz qyzmetine silteme jasap.
«Gazel» avtokóligi Quıǵan-Topar avtojoly boıynda toqtatylǵan. Kóliktegi 3 tonna 198 kg balyqtyń zańǵa sáıkes tıisti tasymaldaý qujattary bolmady. Bul fakti boıynsha QR Qylmystyq kodeksiniń 335-baby 4,5-tarmaqtary boıynsha sotqa deıingi tergeý jumystary júrip jatyr»,- dedi Almaty oblystyq JPQ Tabıǵat qorǵaý polıtsııasynyń ınspektory polıtsııa kapıtany Baǵlan Rymjanov.
Polıtseıler tabıǵat qorǵaý vedomstvolarymen birlese otyryp, ósimdikter men janýarlar dúnıesine zańsyz qol suqqqandardy anyqtap, budan ári zań buzýshylyqtardy boldyrmaý maqsatynda keshendi sharalar qabyldaýda.
Sonymen qatar, 17 qarasha kúni keshke «Rýbej» polıtsııa beketinde tártip saqshylary Nıssan kóliginiń júksalǵyshynan zańsyz atylǵan 3 eliktiń etin tapty. Jambyl aýdanynyń turǵyny tizgindegen avtokólikti tekserý barysynda «SKS» oıyq ańshy myltyǵy men ruqsat etý merzimi ótip ketken ańshy myltyǵy tabyldy. Zańsyz ańshylyqpen aınalysqany úshin QR Qylmystyq kodeksiniń 337-baby boıynsha sotqa deıingi tergeý amaldary júrgizilýde.
«Atalǵan fakti boıynsha tıisti saraptamalar taǵaıyndaldy»,- dep atap ótti oblystyq polıtsııa departamentiniń baspasóz qyzmeti.
Illıýstratsııalyq foto
