Qaraǵandy turǵyny sot zalynan qashyp ketkeni úshin sottaldy
QARAǴANDY. QazAqparat - Qaraǵandy turǵyny sot zalynan qashyp ketkeni úshin 1 jyl 2 aıǵa bas bostandyǵynan aıyryldy, dep habarlaıdy «QazAqparat» HAA tilshisi.
23 jastaǵy qashqyn Dmıtrıı Byrsany sot QR QK 426-baby «Kúzetten qashý» baby boıynsha kináli dep tanydy.
«Byrsa Dmıtrıı Sergeevıchti QR QK 426-baby 1-bólimi boıynsha kináli dep tanyp, qaýipsizdigi ortasha qylmystyq-atqarý júıesi mekemelerinde jazasyn óteý arqyly 1 jyl 2 aıǵa bas bostandyǵynan aıyrý jazasy taǵaıyndalsyn», - dedi úkimdi jarııalaǵan Qaraǵandy №1 Qazybek bı aýdandyq sotynyń sýdıasy Aıgúl Myrzabekova.
Sottalýshy sot zalynan 25 tamyz kúni 20 saǵat 45 mınýtta qashqan. Sol sátte ony alyp kele jatqan Qaraǵandy oblystyq ІІD konvoılyq qyzmet rotasynyń aıdaýyly sot aýmaǵyndaǵy avtozaktyń esigin ashpaq bolyp alǵa túsedi. Tap sol kezde qoly kisendeýli Byrsa basqa eki aıdaýyldan sytylyp shyǵyp, turǵyn úıdiń aýmaǵyna qaraı qasha jónelip, sońynan qýǵandardan izin jasyryp úlgeredi. Qashqyndy ertesine, 26 tamyzda tutqyndalǵanǵa deıin jubaıy jáne eki balasymen turǵan Mıhaılovka aýdanyndaǵy úıine jaqyn jerden tabady. Ol polıtsııa jasaǵynan ózi berildi.
Dmıtrıı Byrsa óziniń bul áreketin sot úkimine deıin tonaǵan adamdardyń zalalyn óteý úshin aqsha tabýǵa talpynǵandyǵymen túsindirdi.
