Qaraǵandy turǵyny óziniń súıikti isin bızneske aınaldyrdy
QARAǴANDY. QazAqparat - Qaraǵandylyq Symbat Elikbaev óziniń súıikti isin bızneske aınaldyrdy, dep habarlaıdy QazAqparat Qaraǵandy oblysy ákimdiginiń baspasóz qyzmetine silteme jasap.
Birneshe jyl ishinde onyń isi úlkeıgeni sonshalyq, qazir onyń komandasynda birneshe adam jumys isteıdi. Al onyń tabıǵı bylǵarydan jasalǵan ónimderin elimizdiń qalalary tapsyryspen aldyrady.
Jaqynda Symbat respýblıkalyq «Qaıyrymdylyq kerýeni» baıqaýynyń «Asar» nomınatsııasy boıynsha jeńimpazy atandy. Ol balalar úıiniń tárbıelenýshilerin halyq qolónerine tegin úıretedi.
Qazir Symbat Qalıevanyń «Sán-Symbat» degen óz brendi bar. Ol bylǵarydan ulttyq naqyshta aksessýarlar jasaıdy. Mysaly, qoldorbalar, ámııandar, kiltke taǵatyn áshekeıler jáne taǵy basqa. Kásipker etnostılge, ulttyq oıý-órnekke degen qyzyǵýshylyqty anasy oıatqanyn aıtady.
«Meniń anam jáne enem kıizden ulttyq qazaqı órnektermen ártúrli zattar jasady. Olar bul - saqtalýy tıis óner dep aıtyp otyratyn. Oıý-órnektiń ádemiligin men es bilgeli túsindim. Sol kezde olardy ártúrli dúnıelerge jabystyryp, órnekteı bastadym», - deıdi Symbat.
Ol aldymen kıizden kádesyılar jasap, bazarda saýdaǵa shyǵarǵan. Bas kezinde suranys asa qatty bolmady dep eske alady. Merekelerge kádesyılardy kóbirek alatyn, al kúndelikti tutyný úshin kıiz ónimderi jaramady.
Kórmelerden soń Symbatta oıynshyqtar men kádesyılar qalsa birden olardy jetimder úıine syıǵa tartatyn.
«Maǵan tárbıeshiler habarlasyp, meniń oıynshyqtarymdy balalar uıyqtaǵanda qushaqtap jatady dep aıtqanda júregim eljirep ketti. Odan keıin men tek oıynshyq syılap qana qoımaı, ony balalar óz erikterimen jasaýǵa úıretý kerek dep sheshtim. Aldymen baǵdarlama qurdym, qazir sol boıynsha balalarǵa tegin úıretemin», - deıdi Symbat.
Budan bólek, óziniń súıikti isin turaqty tabys kózine aınaldyrýǵa umtyldy. Óz ónimderin bazarlarda saýdalady.
«Meniń jumysym úshin maǵan usynǵan baǵadan tómen surady. «Sende tseh joq, ónim az, úıde jumys isteısiń» degen áńgimeler aıtyldy. Biraq men kóńil-kúıimdi túsirmedim. Ary qaraı jumysymdy jalǵastyra berdim. Suranysty baqylap otyrdym. Odan keıin Symbat kıiz ónimderin jasaıtyn shaǵyn tseh ashýǵa sheshim qabyldady. Biraq ol tabys ákelmedi.
«Odan keıin men nege bylǵarymen jumys istemeske dep oıladym. Bul eskirmegen materıal, árqashan suranysta jáne odan kúndelikti qoldanatyn zattar jasaýǵa bolady. Kıizden góri, bylǵaryǵa suranys joǵary. Endi satyp alýshylar meni ózderi izdeıdi. Ulttyq stılde jasalǵan kilt salatyn, ámııan jáne breloktar kóp alynady», - deıdi Symbat.
Onyń sózinshe, jetistikke jetýine jaqyndarynyń qoldaýy zor bolǵan. Oǵan sonymen qatar, aımaqtyq isker áıelder qaýymdastyǵy da úlken kómek kórsetken.
«Seni qoldaý, senim artý - bul basty kúsh. Qansha myqty, maqsatshyl bolsań da qoldaýsyz, qamqorsyz naǵyz áıel bola almaısyń dep oılaımyn. Al, eger náziktik týraly aıtar bolsam, qolóner bul qasıetterdi jaqsy damytady. ıAǵnı shydamdylyq, uqyptylyq, kishkentaı nárselerdi baıqap qalý, qyraǵylyq, tapsyrys berýshige unaý úshin oılaý, kúsh jumsaý sekildi qasıetter damıdy», - deıdi Symbat.
Qazir ol kórmege daıyndalyp jatyr jáne bylǵary men aǵashty úılestirip jańa toptamasyn jasaýda.
Sonymen qatar balalar úıiniń tárbıelenýshilerine arnalǵan jańa baǵdarlamamen jumys jasaýda. Osy jyldyń aqpan aıynda «Qaıyrymdylyq kerýeni» respýblıkalyq konkýrsynda «Asar» atalymy boıynsha jeńimpaz atandy.
Symbat Elikbaevanyń sózinshe, bul jeńis ony qaıyrymdylyq jasaýǵa odan beter qulshyndyra túsken. Bıyl ol balalar úıiniń tárbıelenýshilerine kóbirek sabaq ótkizýdi josparlap qoıǵan.
