Qaraǵandy turǵyny ózin UQK polkovnıgimin dep tanystyryp, polıtseılerdi aldamaq boldy

QARAǴANDY. QazAqparat – Qaraǵandynyń 47 jastaǵy turǵyny ózin Ulttyq qaýipsizdik komıteti ishki tergeý departamenti bastyǵynyń orynbasary, polkovnıkpin dep tanystyryp, tártip saqshylaryn aldaǵan. Ony áshkereleýge polıtseıler men UQK qyzmetkerleriniń birlesken jumysy septigin tıgizdi, dep habarlaıdy Polisia.kz.

Bul oqıǵa 23 sáýirde tótenshe jaǵdaı rejımi kezinde bolǵan. Onda er adam kóligimen kóshe kezip, ony jol erejesin buzǵany úshin polıtseıler toqtatqan. Ol polıtseılerdi UQK polkovnıgimin, ishki tergeý departamenti bastyǵynyń orynbasarymyn dep aldaıdy. Biraq ony rastaıtyn eshqandaı qujat kórsetpegen.

Onyń aıtqan búkil áńgimesi vıdeoǵa túsip qalǵan. Atalǵan azamattyń áreketi kúdik týǵyzyp, mán-jaıdy anyqtaý úshin polıtseıler UQK qyzmetkerlerin shaqyrady. Ustalǵan kúdikti Qaraǵandy qalalyq polıtsııa basqarmasynyń Ońtústik-Shyǵys bólimshesine jetkizildi.

Tergeý barysynda ol óziniń ótirik aıtqanyn moıyndap, ókinetinin aıtty. Er adam Ákimshilik quqyq buzý kodeksiniń 476-baby boıynsha aıypty dep tanyldy. Mamandandyrylǵan ákimshilik sottyń sheshimimen ol 10 táýlikke qamaýǵa alyndy.

«Polkovnıgimiz» buǵan deıin de alaıaqtyǵy úshin sottalǵan. Ol óziniń laýazymy joǵary adam ekenin aıtyp, oblys turǵynynyń qylmystyq jaýapkershilikten jaltarýyna kómektesýge ýáde bergen» dep málim etti Qaraǵandyq oblystyq PD baspasóz qyzmeti.