Qaraǵandy turǵyny koronavırýstan qalaı saýyqqanyn aıtyp berdi

QARAǴANDY. QazAqparat – Tanymal qaraǵandylyq shoýmen Marat Ospanov jaqynda ınfektsııalyq gospıtaldan jazylyp shyqty. Dárigerler onyń ómiri úshin shamamen bir aıdaı kúresti. Onyń ókpesi 90% zaqymdanǵan bolatyn, dep habarlaıdy QazAqparat tilshisi.

Marat Ospanov professor H.J. Maqajanov atyndaǵy kópsalaly aýrýhananyń ınfektsııalyq gospıtaline shilde aıynyń sońynda túsken.

Shamamen bir apta boıy ol ózin-ózi úıde jatyp emdep, bul qarapaıym sýyq dep oılaǵan. Ol tunshyǵa bastaǵanda, áıeli jedel járdem shaqyrdy.

Kompıýterlik tomografııa ókpeniń 90% zaqymdanýyn kórsetti.

«Buryn men koronavırýs týraly barlyq aqparatqa kúmánmen qaraıtynmyn. Asa sengen joqpyn. Búkil dári-dármekti satyp aldym, úıde sýyq tııýden emdeldim. Saldarynan aýrýhanada 16 kún jansaqtaý bóliminde, sodan keıin taǵy bir apta palatada jattym. Eger dárigerler bolmasa, aman qalmas edim. Bul meniń ekinshi týǵan kúnim deýge bolady», - dedi Marat Ospanov.

Endi Maratqa uzaq ońaltý emi júrgiziledi. Ol tynys alý gımnastıkasyn zerttep úlgerdi jáne múmkindik týǵan bette vaktsına alýǵa nıetti.

«Beıtanys adamdar men úshin qan tapsyrdy, áriptester qarjylaı kómektesti, týystarym túnde duǵa etti. Bul jasalyp jatqan jaqsylyq júregimdi eljiretedi. Men óz ómirimdi qaıta qarastyrdym. Barlyǵyn meniń basymnan ótkendi qaıtalamaýǵa jáne dárigerlerdiń usynymdaryn oryndaýǵa shaqyrǵym keledi. Endi vaktsınatsııa aýrýdyń aǵymyn edáýir jeńildetetinine senimdimin. Aýrýhanada bolǵan kezde men vaktsınatsııadan keıin aýyrǵan bir de bir naýqasty kórmedim», - dep qosty Marat Ospanov.

Professor H.J. Maqajanov atyndaǵy kópsalaly aýrýhananyń juqpaly aýrýlar gospıtaliniń dárigerleri syrqattaný kórsetkishi azdap tómendegenin atap ótti.

«Alaıda bosańsýǵa áli erte» deıdi olar.

Dárigerler oblys turǵyndaryn barlyq shekteý normalaryn saqtaýǵa jáne vaktsına alýǵa shaqyrady.