Qaraǵandy turǵyny kólik jýý ǵımaratyn marıhýana saqtaıtyn qoımaǵa aınaldyrǵan

QARAǴANDY. QazAqparat – Qaraǵandy oblysynda 24 kg gashısh pen 200 kg marıhýana tárkilendi. Esirtki satýshy óziniń «isin» dóńgeletý úshin kólik jýýǵa arnalǵan úı-jaıdy jalǵa alǵan, dep habarlaıdy QazAqparat tilshisi.

Qaraǵandy oblysy PD esirtki bıznesine qarsy is-qımyl basqarmasynyń bólimsheleri óńirge esirtki partııalarynyń túsý arnalaryn anyqtaý jáne jolyn kesý boıynsha turaqty negizde arnaıy shara ótkizip jatyr.

Jýyrda Qaraǵandy PB esirtki qylmysyna qarsy is-qımyl bólimine belgili bir qala turǵynynyń marıhýanany saqtaýǵa qatysy bar ekendigi týraly aqparat kelip túsken.

Muqııat daıyndalǵan arnaıy operatsııa barysynda polıtsııa qyzmetkerleri qala aýdandarynyń birinde 37 jastaǵy júrgizýshiniń basqarýyndaǵy kólikti ustady.

Osy kólik quralynyń salonyn tekserý kezinde tórt kishkene orama, al artqy oryndyqtan ósimdik tektes zat salynǵan on túıir taýyp alǵan.

Saraptama qorytyndysyna sáıkes tárkilengen zattar salmaǵy 275 gr gashısh jáne salmaǵy 9,8 kg keptirilgen marıhýana ekeni anyqtaldy.

«Ustalǵan adamnyń kólik jýý jáne shınomontaj ǵımaratyn jalǵa alatyny anyqtaldy. Osy obektilerdi tintý barysynda ósimdik tektes zaty bar toǵyz qap jáne qara qońyr tústi zaty bar úsh qap tabyldy. Saraptama qorytyndysyna sáıkes bul zattar - salmaǵy 23,6 kg gashısh jáne salmaǵy 190,1 kg keptirilgen marıhýana. Kúdikti ýaqytsha ustaý ızolıatoryna qamaldy. Tergeý sharalary júrip jatyr», - dep málimdedi oblystyq PD bastyǵynyń orynbasary Ábil Ábildın.

Vıdeodan alyn ǵ an kadr