Qaraǵandy turǵyny AI-93 markaly janarmaıdy zańsyz satyp 58 mıllıon teńge paıda tapqan
ASTANA. Qazannyń 28-i. QazAqparat /Aıdar Ospanalıev/ - Qaraǵandy oblysynda AI-93 markaly janar maıdy zańsyz saýdaǵa salyp, 58 mıllıon teńge paıda tapqan Sh.Tsokaev atty azamatqa qatysty qylmystyq is qozǵaldy.
Bul málimetti búgin Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı jýrnalıstermen bolǵan aptalyq brıfıngte jarııa etti, dep habarlaıdy QazAqparat.
Onyń derekterine qaraǵanda, osy tektes áreket Ońtústik Qazaqstan oblysynda da oryn alǵan. Onda A.Jumadollaev atty azamat lıtsenzııasyz ózi jalǵa alǵan «ShNOS» janar maı stansysynda janar-jaǵar maı satýmen jáne saqtaýmen aınalysyp, 24 mıllıon 800 myń teńge paıda kórgen. Atalǵan azamatqa aıyppul salyndy. «Eń soraqysy, mundaı árekettermen qazir kommertsııalyq uıymdardyń basshylary da aınalysa bastapty. Qyzylorda oblysynda «Syr perzenti» jaýapkershiligi shekteýli seriktestiginiń dırektory B.Turǵanov AI-80 jáne AI-93 markaly janar-jaǵarmaıdy lıtsenzııasyz satyp, 29 mıllıon teńge paıda kórgen. Oǵan iri kólemde aıyppul salyndy. Tap osyndaı áreket arqyly 33 mıllıon teńgege oljaly bolǵan Atyraý oblysyndaǵy «Oıl Le Roı» JShS dırektory A.Gorıaevke qatysty qylmystyq is qozǵaldy», dedi resmı ókil.
