Qaraǵandy turǵyny 775 myń teńgesi bar sómkesin taýyp bergen polıtseılerge alǵys aıtty
PAVLODAR. QazAqparat – Qaraǵandy turǵyny 775 myń teńgesi bar sómkesin taýyp bergen polıtseıge alǵys aıtty. Oqıǵa Pavlodar oblysynyń Ekibastuz qalasyna jaqyn mańda bolǵan. Bul týraly Pavlodar oblystyq Polıtsııa departamentiniń baspasóz qyzmeti habarlady.
Baspasóz málimetterine qaraǵanda, Qaraǵandy qalasynyń turǵyny Baımyrza Qadyrbekov, óziniń jeke jáne júrgizýshi kýáligi jáne 775 000 teńge aqshasy bar joǵaltqan sómkesin taýyp jáne ony saqtap qalǵandary úshin Ekibastuz qalasy Polıtsııa basqarmasy patrýldik qyzmet rotasynyń ınspektorlary polıtsııa aǵa leıtenanty Manarbek Maqsutovqa, polıtsııa serjanty Darhan Búketovke jáne avtovokzaldyń qyzmetkerleri alǵysyn bildirdi.
Aǵymdaǵy jyldyń 31 shildesinde saǵat 23.00–de Semeı-Qaraǵandy reıstik avtobýsynyń júrgizýshisi B.S.Qadyrbekov Ekibastuz qalasy arqyly júrip ótý kezinde avtovokzal platformasynda óziniń sómkesin kezdeısoq túsirip alǵan.
«Baǵyt boıynsha Ekibastuzdan 20 shaqyrym jerde ornalasqan Báıet aýylynan kele jatyp, meniń áriptesim sómkem joq ekendigine nazar aýdardy, ol óıtkeni meniń ıyǵymda ilinip turatyn. Sodan keıin men birden avtovokzaldyń dıspetcherligine jáne kezekshi bólimge 102-ge qońyraý shaldym. Endi qaıtemin, az aqsha emes, meniń asyraýymda 6 adam bar. Jalǵyz asyraýshy ózim ǵana dep ýaıymdaı bastadym. Keri qaıtý múmkin emes, óıtkeni salonda Qaraǵandyǵa deıin jol júrip bara jatqan adamdar bar. Baqytyma qaraı telefonyma qońyraý shalynyp, tutqanyń arǵy jaǵyndaǵysy sómkeniń tabylǵanyn habarlady, qýanyshymda shek bolǵan joq. Óıtkeni bul aqshany tapsyrys boıynsha berý kerek edi» - deıdi Baımyrza Serikbaıuly.
